Хĕллехи сунар сезонĕ çывхарать. Вăл кăçалхи ноябрĕн 1-мĕшĕнчен пуçласа 2019 çулхи февралĕн 28-мĕшĕччен пырать. Çак юлнă кунсенче пур сунарçăн та кирлĕ документсене йĕркене кĕртмелле те путевка панă вăхăтра илсе килмелле.

Сунара илсе тухмалли йытăсене уртаракан чиртен сыхлас тĕллевпе вакцинаци тутармалла. Ăна тутарнине йытă паспорчĕ çине çырса хумалла. Справка илсен те юрать. Путевкăсем илнĕ чухне общество тата сунар билечĕсем (вĕсем хĕрлĕ тата симĕс тĕслĕ), пăшал усрама полици ирĕк пани кирлĕ. Путевкăсене октябрĕн 25-мĕшĕнчен пуçласа кашни кĕçнерникун пама пуçлаççĕ. Сунар сезонĕ пĕтсен 10 кун хушшинче лицензипе путевкăсене охотоведа тавăрса памалла.

Юр тарăнланиччен уйсем тăрăх хăйсен транспорчĕсемпе мулкачсемпе тилĕсене хăвалакансене те курма пулать. Çавна шута илсе уйсем тăрăх полици ĕçченĕсемпе пĕрле рейдсем ирттерме палăртнă, йĕркене пăсакансене çирĕп мерăсем кĕтеççĕ. Хăйсен транспорчĕсемпе мулкачсемпе тилĕсене хăва-лакансене асăрхасан полицине тата обществăн председательне А.И.Наумова пĕлтермелле. Çавăн пек меслетпе мулкачсемпе тилĕсене тытакансен сунара çỹремелли документсемпе сывпуллашма тивет.

Сунарта ют çын йытти хăвалакан чĕрчуна персе тытсан тупăшне йытă хуçине памалла та унтан патрон илмелле.

Сунарта пурте пĕр тан, çавăнпа йăла-йĕркесене, аслисене хисеплемелле. Ултавсăр ĕçлемелле, юлташсене яланах пулăшма хатĕр пулмалла.

А.ЭЛЕМЕНКИН.