Районти полици уйрăмĕнчен пĕлтернĕ тăрăх, иртнĕ эрнере 45 заявлени регистрациленĕ, 16 адмпротокол çырнă. Йĕркене пăснă тата пулса иртнĕ хăш-пĕр тĕслĕхсем:

- Çак уйăхра Туканаш çынни (1979 çулта çуралнăскер) Етĕрнери лесничествăн Пантьăк участок лесничествинчи 114 кварталтан (Хĕрлĕ Чутай лесхозĕн Присурски лесничествин пулнă кантурĕнчен) 5 куб. литр кĕрекен тимĕр савăт, вăрман лартмалли "МЛУ-1" виçĕ машин, тимĕр рельс урай каштисем 9 штук - виçĕ метрли 5 тата икĕ метр çурăлли 4 штук - вăрланă. Палăртмалла, 2009 çултанпа асăннă лесничество ĕçлемест. Тăкак суммине шутлаççĕ.

- "Металл" профилактика мероприятийĕ вăхăтĕнче Кив Атикасси ялĕнче кирлĕ документсемсĕрех металлолом турттаракан ГАЗ-2705 автомашинăна тытса чарнă. Ăна Çĕмĕрлере пурăнакан, 1988 çулта çуралнă арçын тытса пынă. Унăн административлă явап тытма тивĕ.

- Иртнĕ эрнере сентябрьте тунă преступление тăрă шыв çине кăларнă. Хĕрлĕ Чутай салинчи I Завод урамĕнчи 60 номерлĕ çурт умĕнчен сентябрĕн 10-мĕшĕнче "Альфа-110" маркăллă мопед ураланнă пулнă. Ăна маларах судпа айăпланман, çул çитмен çамрăксен учетĕнче тăман, Çĕн Ирчемесре пурăнакан çамрăк (2003 çулта çуралнăскер) вăрлани палăрнă.

Н.МИДАКОВА хатĕрленĕ.