Декабрĕн 5-мĕшĕнче 11-мĕш класра вĕренекенсем вырăс чĕлхипе пĕтĕмлетỹ сочиненийĕ çырĕç. Ăна республикăри пур шкулсенче те, вăл шутра пирĕн районта та, ирттерĕç. Унăн кăтартăвĕпе вĕренекенсене пат-шалăх экзаменне тытма ирĕк парĕç.

Районта пĕтĕмпе аттестаци витĕр 69 ача тухĕ. Экзамен Хĕрлĕ Чутайри шкулта иртĕ. 11-мĕш класра вĕренекенсем сочинение 10 сехетре çырма пуçлĕç. Вĕсен сахалтан та 350 сăмах çырмалла. Сочинени çырма 3 сехет те 55 минут уйăрĕç.

Правилăсемпе килĕшỹллĕн шкул ачисене сочинени çырма пилĕк тема параççĕ. Темăсемпе сочинени çыриччен çур сехет маларах паллаштарĕç. Темăсен пуххи кашни регионта тĕрлĕрен. Кăçал вĕренекенсем ашшĕсемпе ачисен, ĕмĕтсемпе чăнлăх, тавăрупа ыркăмăллăх, искусствăпа ал ĕçĕ, ырлăхпа хаярлăх тематикипе сочинени çырĕç.

Чăваш Енре пĕтĕмлетỹ ĕçне 5777 ача çырĕ. Сывлăх енчен хавшакрах ачасем изложени суйлама пултараççĕ. Районта вĕренекенсенчен изложени çырма 1 ача кăмăл тунă. Правилăсемпе килĕшỹллĕн вĕре-некенсен ăнлантаруллă тата орфографи словарĕсемпе усă курма юрать. Вĕсене вырăнта парĕç. Çакна та каламалла, ачасен классене харпăр хăй словарĕсемпе, сотовăй телефонсемпе, смартфонсемпе тата планшетсемпе кĕме юрамасть. Кун пеккине асăрхасан класран кăларса яраççĕ.

Пĕтĕмлетỹ ĕçне "зачет" тата "незачет" тесе хаклĕç. Çак экзамена тытайманнисем ăна февралĕн 6-мĕшĕнче тата майăн 8-мĕшĕнче тепĕр хут тытма пултарĕç. Вунпĕрмĕшсемшĕн тепĕр паллă кун пур. Вĕсен пурин те февралĕн 1-мĕшĕччен мĕнле предметсемпе экза-мен тытассине суйласа палăртмалла.

Игорь ЖИВОЕВ, район администрацийĕн пуçлăхĕн çумĕ - вĕренỹ пайĕн начальникĕ.