Иртнĕ эрнере районта иртнĕ "Иксĕлми Чутай çăлкуçĕсем" фольклор фестивалĕнче Мăн Этменти Культура çурчĕн "Елĕм" фольклор ушкăнĕ улах каçне сăнласа пачĕ. Этменсем сцена çине аслисемпе танах çамрăксене те явăçтарнипе асра юлчĕç.

Мăн Этменти Культура çурчĕн заведующийĕ Джамиля Богославская тăрăшнипе тата Валентина Немешкина йĕркелесе ертсе пынипе хĕллехи улах каçне сăнласа панă çĕре Мăн Этменти вăтам шкулта вĕренекенсем те хутшăнчĕç. Авалхи чăвашсен евĕр çи-пуçлă, урисене çăматă тăхăннă е çăпата сырнă каччăсемпе хĕрсем - 5-мĕш класра вĕренекен Анна Ятманова, 8-мĕш класри Виктория Кортунова, 9-мĕш класри Кирилл Артюшкин, 10-мĕш класри Лев Абаськин, 11-мĕш класра вĕренекен Александр Данилов, Юлия Федорова, Иван Ермаков ĕлĕк асаттесемпе асаннесем улахра юрланă юрăсене юрларĕç, вăйăсем вылярĕç, ташласа та кăтартрĕç.

Аслисем пулăшнипе йăла-йĕркесене упраса пыма вĕренекен яшсемпе хĕрсем шкулта ирттерекен мероприятисене те тăтăшах хутшăнаççĕ. Нумаях пулмасть районта иртнĕ "Асамлă чаршав" фестивальтен те аякра юлман вĕсем, вырăнти Культура çурчĕ хатĕрленĕ спектакльте вылянă.

А.КАРПОВА.