Иртнĕ ĕмĕрте пирĕн районти 32 ялта вăтам тата пуçламăш шкулсем ĕçленĕ. ХХ ĕмĕр вĕçнелле вĕсенчен чылайăшне пĕрлештернĕ е пачах хупнă. Хальхи вăхăтра районта 9 шкул ĕçлет, вĕсенчен 5-че вăтам пĕлỹ параççĕ.

Архивсенчи документсем çирĕплетнĕ тăрăх, районти чылай шкул çĕр çул урлă каçнă ĕнтĕ. Декабрĕн 15-мĕшĕнче вара Çĕн Атикасси шкулĕ хăйĕн 100 çулхи юбилейне паллă турĕ.

Çĕн Атикассинчи пуçламăш шкул 1918 çулхи сентябрĕн 1-мĕшĕнче ĕçлеме пуçланă. Унăн малтанхи заведующийĕ Иван Васильевич Афанасьев пулнă. Çулталăкран ăна Хĕрлĕ Çар ретне илнĕ.

Малтанах ачасене йывăç пĕренесенчен тунă çуртсенче вĕрентнĕ пулсан, 1988-1990 çулсенче кунта кирпĕчрен икĕ хутлă çĕнĕ вĕренỹ корпусне туса хута янă. Вăл вăхăтра шкул директорĕнче Андрей Михайлович Дерстуганов тимленĕ.

Хальхи вăхăтра Çĕн Атикасси шкулне таврари 21 ялтан ачасене автобуспа турттараççĕ. Шкулта 21 педагог ĕçлет, вĕсем 135 вĕренекене тарăн пĕлỹпе тивĕçлĕ воспитани парассишĕн тăрăшаççĕ. Директор ĕçĕсене Галина Валериевна Алексеева пурнăçласа пырать.

Шкулăн 100 çулхи юбилейне уявланă çĕре халăх йышлă пухăнчĕ - кунта пĕлỹ илсе пурнăç çулĕ çине тухнисем чылаййăн, вĕсенчен нумайăшне районта кăна мар, республикăра та пĕлеççĕ. Çĕн Атикасси шкулĕн малашлăхĕ çутă пуласса, кунта ача-пăча сасси нихăçан та татăлмасса шанас килет.

Геннадий САВЕЛЬЕВ.