Чăваш Республикин Министрсен Кабинечĕн 2018 çулхи декабрĕн 12-мĕшĕнчи 512 № йышăнăвĕпе килĕшỹллĕн, çитес çултан халăха тивĕçтерекен çутçанталăк газĕн хакĕ улшăнать. Çакă 2019 çулхи январĕн 1-мĕшĕнчен НДС ставки 20 процент ỹснипе çыхăннă. Çавăнпа та январĕн 1-мĕшĕнчен коммуналлă пулăшусемшĕн тỹлесси 1,7 процент индексациленет, 2019 çулхи июлĕн 1-мĕшĕнчен - 2 процент.

НДС-ăн 20 процентлă ставкине шута илсен республикăра газ хакĕ январĕн 1-мĕшĕнчен пĕр кубла метршăн 5,62 пус пулать. Хальхи пĕр кубла метр хакĕнчен 9 пус хаклăрах.

Çапла вара 2019 çулхи январĕн 1-мĕшĕнчен граждансен газ плитипе усă курса апат пĕçернĕшĕн (газ счетчикĕ çук пулсан) пĕр çын пуçне 67,44 тенкĕ тỹлеме тивет. Ỹсĕм 1,7 процент пулать. Хальхи вăхăтра газшăн пĕр çын пуçне тỹлемелли хак 66,36 тенкĕпе танлашать.

Çутăшăн тỹлемелли хаксем те улшăнаççĕ. Январĕн 1-мĕшĕнчен хулара пурăнакансен пĕр киловат сехетшĕн 3,30 тенкĕ тỹлемелле пулать (ỹсĕм 1,6 процентпа е 5 пуспа танлашать), ялта пурăнакансен - 2,31 тенкĕ (ỹсĕм - 1,4 процент е 3 пус).

Вĕри тата сивĕ шывшăн, ăшăшăн, хытă каяшсене илсе тухассишĕн тарифсем çак пулăшусемпе мĕнле ресурс организацийĕ тивĕçтернинчен килет. Енчен те организаци НДС тỹлет пулсан, хаксем улшăнма пултараççĕ.

Тарифсем пирки тĕплĕнрех Чăваш Республикин конкурентлă политикăпа тарифсен патшалăх службин сайтĕнче пĕлме пулать.

А.ТИМОФЕЕВА.