Инкек куçа курăнса килмест тесе ахальтен каламаççĕ. Харпăр хăйĕн килĕнче пушар тухма пултарасса та никам та шутламасть. Акă Питĕркассинче пурăнакан пилĕк ачаллă çемье те февралĕн 13-мĕшĕнче кил-çуртсăр тăрса юласса чухламан та. Телее, çил-тăвăлпа вут-çулăм хытах алхаснă вăхăтра килте никам та пулман, çемье членĕсем пурте чĕрĕ-сывă. Пушар электрохатĕртен тухма пултарнă.

Тепĕр кунне вара Туктамăш ялĕн че пĕччен пурăнакан арçын çуртĕнче вут-çулăм "хуçаланнă", кил хуçин кĕлетки пиçсе кайнă. Сăлтавĕ - пирус туртнă чух вутпа асăрханусăр пулнинче. Палăртса хăвармалла, асăннă арçын килĕнче пушар пĕрремĕш хут кăна тухмасть. Аса илтеретпĕр, паянхи куна кăçал район территорийĕнче виçĕ пушар тухрĕ, пĕлтĕр ку тапхăрта тăватă вут-çулăм инкекĕ пулнăччĕ.

Районта пурăнакан хисеплĕ çыннăмăрсем! Пĕчĕк çăмăлттайлăх, асăр ханусăрлăх пысăк инкекпе вĕçленме пултарнине асра тытăр. Кивĕ электропралуксене çĕннипе ылмаштарма васкăр, юсавсăр оборудованипе усă ан курăр, вут тивертсен е пĕр-пĕр электрооборудование розеткăна чиксен тимлĕхсĕр ан хăварăр, ачасене шăрпăкпа выляма юраманни пирки асăрхаттарсах тăрăр. Ан манăр: инкеке асăрхаттарма çăмăлрах!

А.ЯРАБАЕВ, пушар асăрхав пайĕн аслă инспекторĕ.