Февралĕн 22-мĕшĕнче районти Нумай функциллĕ культура центрĕнче Çĕршыв хỹтĕлевçин кунне халалланă уяв каçĕ иртнĕ. Унта пултаруллă та талантлă шкул ачисене Раççей Федерацийĕн Патшалăх Думин депутачĕн Николай Маловăн ятран паракан стипендине тивĕçнине ĕнентерекен сертификатсем парса чысланă.

Кăçал депутат стипендине Мăн Этмен шкулĕнче вĕренекен Дарья Волкова, Хусанушкăнь шкулĕнчи Вадим Степкин, Питĕркасси шкулĕнчи Сергей Вазин, Çĕн Атикасси шкулĕнчи Анастасия Вашуркина тата Вероника Якимова, Тури Çĕрпỹкасси шкулĕнчи Анастасия Яковлева, Атнар шкулĕнчи Руслан Никитин, Хĕрлĕ Чутай шкулĕнчи Петр Романов, Виктория Серина тата Яна Никифорова тивĕçнĕ.

Çавăн пекех уяв каçĕнче çамрăксене гражданла тата патриотла, кăмăл-сипет воспитанийĕ парас ĕçе тỹпе хывнăшăн райадминистрацин финанс пайĕн ертсе пыракан эксперт специалисчĕ, Тинĕс çар флотĕнче службăра пулнисен районти обществăлла организацийĕн членĕ Петр Баринов, райадминистрацин право ĕçĕсен секторĕн эксперт специалисчĕ, районти Ашшĕсен канашĕн членĕ Алексей Матюшкин, район больницин врач-наркологĕ, пограничниксен çарĕнче службăра тăнисен районти обществăлла организацийĕн председателĕ Александр Яковлев РФ Патшалăх Думин депутачĕн Николай Маловăн Тав çырăвне тивĕçнĕ.

Уяв каçне çавăн пекех район пуçлăхĕ А.Степанов, райадминистраци пуçлăхĕ А.Башкиров, Красноармейски район администрацийĕн пуçлăхĕ А.Кузнецов хутшăннă. Чыслав хыççăн уява пухăннисем концерт курса савăннă.

А.КАРПОВА.