Алла кĕнеке тытма кăмăллакансене районти библиотекăсенче хаваспах кĕтсе илеççĕ. Ĕçе чунтан парăннă çынсем ватти-вĕттине те çĕнĕ кĕнекесемпе паллаштарма васкаççĕ, вĕсене валли тĕрлĕ мероприяти ирттереççĕ.

Акă Сĕнтĕкçырми библиотекинче тăрăшакан Елена Васильевна Самсонова та хăйĕн кун-çулне кĕнекесемпе, унăн тус-тантăшĕсемпе çыхăнтарнă. Çак ĕçре вăл 29 çул тимлет. Хусанушкăнь ял тăрăхĕн пуçлăхĕ те ун пирки ыррине кăна калать. Елена Васильевнăсăр ялти, районти пĕр мероприяти те, пултарулăх фестивалĕ те иртмест иккен. Пĕр-пĕр курав-и, фестиваль-и - вăл яланах ыттисене хавхалантарать, коллектива "чĕртет" темелле. Унсăр пуçне клуб ертỹçипе Фаина Яковлевна Корчагинапа пĕрле шкул ачисене валли тĕрлĕ ташă каçĕсем йĕркелеççĕ. Çамрăксемпе ĕçлеме юратнине пула ачасем те ун патне туртăнаççĕ, вăл ирттернĕ уявсене, конкурссене хутшăнма васкаççĕ.

Пур енчен те пултаруллă хĕрарăм çемйи валли те, пĕчĕк мăнукĕ валли те вăхăт тупать. Пĕр-пĕринпе килĕштерсе пурăнать çемье.

Мăшăрĕн Мускавра тăрăшма тивет пулин те, çемье чун канăçне ĕçре кăна мар, спортра та туптать.

А.ВАСЮКОВА.