Районти ялхуçалăх предприятийĕ сем çурхи ĕçсене пуçăннă. Чи малтанах уй-хир техники "Коминтерн" тата "Нива" ЯХПК-сенче ĕçлеме пуçланă.

Халĕ районта кĕрхи культурăсене, нумай çул ỹсекен курăксене апат-лантарас ĕç пырать. Çав хушăрах малта пыракан хуçалăхсем акана та тухнă. Акă апрелĕн 23-мĕшĕнче "Нива" ЯХПК-ан механизаторĕсем акмалли агрегата уй-хире кăларнă, тăпрана пĕрремĕш вăрлăх хывнă. Кунта чи малтанах урпа акма пуçланă. Ялхуçалăх предприятийĕн тĕп агрономĕ Алексей Воронов каласа панă тăрăх, çак культура 366 гектар йышăнмалла. Пĕрчĕллĕ тата пăрçа йышши культурăсем валли 776 гектар уйăрнă.

Çĕртме тăвас ĕç те вĕçленмен-ха. "Коминтернра" çĕртмене пĕтĕмпе 1000 гектар çинче йăтмалла. "Нивара" вăй хуракансен çак ĕçсене 937 гектар çинче туса ирттермелле. Хуçалăхсенче ỹсен-тăран удобренийĕпе хỹтĕлев хатĕрĕсене çителĕклĕ туянса хунă. Нумаях пулмасть çĕнĕ техника туяннă - 688 пин тенкĕлĕх сеялка. Çак акмалли агрегат "Коминтерн" хуçалăха самай пулăшĕ. Унăн акмалли çĕр лаптăкĕ 1800 гектар йышăнать. Вĕсенчен 950 гектарĕ тыр-пул пулĕ, 400-ĕшĕ - пĕр çул ỹсекен курăксем, 400-ĕшĕ - кукуруз. Кунта апрелĕн 24-мĕшĕ тĕлне пĕрчĕллĕ культурăсене 400 гектар çинче апатлантарнă. Уй-хирте 12 техника ĕçлет.

Район администрацийĕн пуçлăхĕ Александр Башкиров палăртнă тăрăх, çурхи уй-хир ĕçĕсене йĕркеллĕ ирттерсен хуçалăхсенчи ака ĕçĕсем палăртнă вăхăта вĕçленмелле. Çакна валли ялхуçалăх техники юсавлă, çĕр ĕçченĕсен ĕçлес туртăм та пур.

А.ВАСЮКОВА.