Нумаях пулмасть Шупашкарти "Радуга" культурăпа курав центрĕнче "Манăн çемье - Аслă Çĕнтерỹ историйĕнче" ятпа курав уçăлнă. Çавăн чухнех çак ятпа иртнĕ конкурс çĕнтерỹçисене те чысланă.

Республика шайĕнче иртнĕ асăннă конкурса пурĕ ача садне çỹрекенсемпе шкул ачисенчен, студентсенчен, аслисенчен 1084 материал килнĕ. Вĕсене виçĕ номинаципе хакланă: "Вăрçă фотохроники", "Тĕпчев ĕçĕсем", "Çĕнтерỹçĕпе видео урлă калаçни". Пур конкурс ĕçне те "Манăн çемье - Аслă Çĕнтерỹ историйĕнче" халăх сайтĕнче (www.победители21.рф) курма пулать.

Конкурса хутшăнакансем хăйсен ĕçĕсенче тăванĕсемпе çывăх çыннисем Аслă Отечественнăй вăрçă çулĕсенче паттăрлăх кăтартни пирки каласа панă. Чи лайăх 75 ĕçе дипломсемпе парнесем парса чысланă. Палăртма кăмăллă, чыслава тивĕçнисем хушшинче Хĕрлĕ Чутай шкулĕнче 6 Б класра вĕренекен Дмитрий Пудаев та пулнă (ертỹçи - Галина Бровкина).

Дмитрий хăйĕн конкурс ĕçĕнче "Катюша" ракета комплексĕн пĕрремĕш тĕпчевĕсене хутшăннă мăн аслашшĕ Алексей Анисимович Захаров пирки çырса кăтартнă.

Алексей Захаров Шулю ялĕнче çуралса ỹснĕ, вăрçăра аслă сержант, радиостанци начальникĕ тата батарея комсоргĕ пулнă. Нимĕçсем вырăссен тĕлĕнтермĕш "Катюшăсен" вăрттăнлăхне питĕ пĕлесшĕн пулнă, анчах та Иван Флеров ертсе пыракан батарея ракетчикĕсем хăйсен пурнăçне шеллемесĕр çĕнĕ хĕç-пăшал вăрттăнлăхне упраса хăварнă. Фашистсем тапăнсан батарейăри 180 çынран 40-шĕ çеç чĕрĕ юлнă, çав шутра - Алексей Захаров та.

Хăйĕн тĕпчев ĕçне Дмитрий Пудаев Алексей Захаровăн асаилĕвĕсене, Н.М.Афанасьевăн "Первые залпы" кĕнеке сыпăкĕсене, пĕрремĕш ракетчиксен списокне кĕртнĕ.

А.КАРПОВА.