Кашни çулах июлĕн пĕрремĕш шăматкунĕнче Раççей кооператорĕсем хăйсен професси уявне паллă тăваççĕ. Хĕрлĕ Чутай райповĕ те уява паян савăнăçлă лару-тăрура паллă тăвать.

Райпо районăн социаллă пурнăçĕпе экономика аталанăвне пысăк витĕм кỹнипе пĕрлех Чăвашпотребсоюз тытăмне кĕрекен предприятисемпе организацисем хушшинче йĕркелекен экономика ăмăртăвĕнче тăтăшах малти вырăнсене йышăнать. Çавăнпах ĕнтĕ Чăвашпотребсоюз ертỹçи Валерий Павлов райпо Канашĕн председательне Александр Степанова тăтăшах тĕрлĕ хисеп хучĕсемпе наградăсем парса чыслать.

Кăçалхи пĕрремĕш квартал кăтартăвĕсемпе райпо потребитель обществисем хушшинче пĕтĕмĕшле ĕç-хĕле аталантарнăшăн иккĕмĕш вырăн йышăннă, обществăлла апатланăва аталантарнăшăн - виççĕмĕш вырăн, çĕрулми пухнăшăн - пĕрремĕш вырăн, çăкăр туса кăларнăшăн - пĕрремĕш вырăн, кондитер изделийĕсене туса кăларнăшăн - иккĕмĕш вырăн, алкогольсăр сĕткенсем туса кăларнăшăн - виççĕмĕш вырăн.

Нумаях пулмасть вара, май уйăхĕнче, Центросоюз çăкăр пĕçерес енĕпе йĕркеленĕ Кубокран Чăвашпотребсоюз команди çĕнтерỹпе таврăннă. Чăваш кооператорĕсене тивĕçлĕ шайра кăтартса пама пултарнă çăкăр пĕçерекенĕсем хушшинче Хĕрлĕ Чутай райповĕн "Четайское" ТЯО технологĕ Маргарита Валентиновна Тихонова та пулнă.

Райпо тытăмне кĕрекен лавккасемпе обществăсенче ĕçлекенсем мĕнле наградăсене тивĕçнипе хаçатăн çитес номерĕнче паллаштарăпăр.

А.СЕМЕНОВА.