Хĕрлĕ Чутай салин Кивĕ центрĕнчи икĕ пĕвене, "Хĕвел" ача сачĕпе редакци айккинче вырнаçнăскерсене, никам та пăхса тăманни пирки эпир пĕлтĕрхи ноябрь уйăхĕнче çырнăччĕ.

Ку пĕвесем симĕс шыв курăкĕпе хупланнă. Намăссăрсем, чунсăр çынсем кунта тĕрлĕ çỹп-çап, ăпăр-тапăр вăркăнтарса хăварма именменрен шыв курăкĕ çийĕн халĕ пластик савăт таврашĕ "ишсе çỹрет". Хур-кăвакал вырăнне.

Хур-кăвакал таврашне вара ку пĕвесенче тахçантанпах курман. Те усрама пăрахнă ял çыннисем, те кăларса яма хăраççĕ.

Пĕве айккипе ỹсекен курăка çулса тăракан, хыт-хурана пуçтаракан çук тесе çырнăччĕ эпир пĕлтĕр. Хыççăнах пĕр пĕви тавра йывăç-туратсене килсе каснă пекки туса кайрĕç. Каснă йывăçĕсем вара çавăнтах - хăшĕ çыранта, хăшĕ пĕвере - выртса юлчĕç. Хĕл иртрĕ, çу çитрĕ - вĕсем халĕ те çавăнтах выртаççĕ. Çиелтен вара татах курăк, вĕлтĕрен, пиçен таврашĕ, çамрăк хунавсем шăтса тухрĕç. Иртен-çỹрене çỹп-çап пăрахса хăварма питĕ меллĕ ĕнтĕ...

Самай çул хĕррипе курăкне çулса каяççĕ-ха. Шалараххине вара, пĕвесен çыранĕ хĕррипе, камăн тасатмалла тет? Çак пĕвесене пăхса тăрассишĕн яваплисем çуках-ши? Тăван тавралăха, çутçанталăка таса, тирпейлĕ тытмалли пирки калаçнипех ĕç пулать теççĕ-ши?

Çак пĕвесенчи тасамарлăха капмар та илемлĕ ача садне çỹрекен шăпăрлансем кураççех. Пулă тытса ларма, шăрăх çанталăкра шыва кĕрсе уçăлма, канма юрăхлă пĕвесем вырăнне ачасем шурлăха çаврăнма пуçланă илемсĕр вырăна курса ỹсни йĕркеллĕ пулăм-ши вăл?

Ачасенчен вăтанса йĕрке тăвасчĕ хăть...

Алина ИТТИ.