Çулсерен çĕнетсе тăракан районăн Хисеп хăми çинче тĕрлĕ тытăмра ĕçлекенсен сăнне курма пулать. Кăçал Хисеп хăми çине вырнаçма тивĕçнисенчен пĕри вăл - Хĕрлĕ Чутай салинчи 33-мĕш номерлĕ пушар чаçĕн караул начальникĕ Федор Владимирович Михеев.

Ишеккасси ялĕнче пурăнакан Федор Михеев пушар хуралĕнче 2003 çултанпа вăй хурать. 1998 çулта Серенкасси шкулĕнчен вĕренсе тухсан вăл Сĕнтĕрвăрринчи вăрман хуçалăхĕн техникумĕнче пĕлỹ илет. Хыççăн салтака каять. Тăван çĕршыв умĕнчи тивĕçне Федор Михеев пограничниксен çарĕсен тинĕс чаçĕнче пурнăçлать: малтанах ултă уйăх хушши Анапăра, унтан - Ленинград облаçĕнче, Балти флотĕнче.

Районти пушар чаçĕнче ĕçлеме пуçласанах Федор Владимирович пушар профилактикин инструкторĕнче тимленĕ, хыççăн - инженерта. 2008 çултан пуçласа пилĕк çула яхăн пушар чаçĕн начальникĕнче тăрăшнă. 2012 çулхи февралĕн 1-мĕшĕнчен тытăнса вăл караул начальникĕнче вăй хурать. 2013 çулта Федор Михеев Чăваш патшалăх педагогика университечĕн пушар хăрушсăрлăхĕн кафедринчен аслă пĕлỹ илсе тухнă.

Чăваш Республикин Гражданла оборона тата чрезвычайлă лару-тăру ыйтăвĕсемпе ĕçлекен патшалăх комитечĕн "Чăваш Республикин пушара хирĕç кĕрешекен служби" хысна учреждени тытăмне кĕрекен Хĕрлĕ Чутайри 33-мĕш номерлĕ пушар чаçĕнче паянхи кун Андрей Секайкин ертỹçĕпе пĕрле 20 çын ĕçлет.

Вут-çулăмпа кĕрешекенсем - тăватă караул начальникĕ, пушар сỹнтерекенсем тăваттăн тата сакăр водитель - дежурствăпа виç кун урлă талăкшарăн ĕçлеççĕ. Пĕр сменăра пĕр караул начальникĕ, икĕ водитель тата пĕр пушар сỹнтерекен талăкĕпех хуралта лараççĕ. Вут-çулăмпа кĕрешме кунта тăватă пушар машини пур, вĕсенчен иккĕшне пушар чаçне пĕлтĕр панă.

Пушар çынна мĕн тери инкек кỹме пултарнине пурте пĕлетпĕр: "хĕрлĕ автан" алхасма пуçласан пурлăхсăр тăрса юлма та пулать, вутпа сĕрĕмре çын пурнăçĕ татăласси те инçе мар. Ăçта та пулин вут-çулăм тухсан ăна сỹнтерме васкакан пушар хурал ĕçченĕсен пурнăçĕшĕн мĕнле хăрушлăх тухса тăни вара каламасăрах паллă. Федор Михеев пушар чаçĕнче ĕçленĕ хушăра мĕнле кăна йывăр лару-тăрура пулман пуль, мĕнле кăна пушар сỹнтермен пуль. Пĕррехинче "хĕрлĕ автан" çавăрса илнĕ çурта сỹнтерме кĕрсен Федор Владимирович чутах пурнăçĕпе сывпуллашман - çуннă пỹрт урайĕ ишĕлнĕрен вăл сакайне анса кайнă. Ăна çав вăхăтра юнашар ĕçтешĕ пулни, сакайĕнчен туртса кăларни кăна çăлса хăварнă.

Кун пек ĕçре юлташлăх туйăмĕ, пĕр-пĕрне пулăшма хатĕр пулни питĕ пĕлтерĕшлĕ ĕнтĕ. Хăйсен ĕçĕнчи хăрушă самантсем пирки пушар хуралĕн ĕçченĕсем питех аса илесшĕн мар. Федор Михеев та çавах.

"Пушар тухни пирки шăнкăравласа пĕлтернĕ хыççăн пирĕн инкек пулнă çĕре 52 çеккунт хушшинче пуçтарăнса тухса каймалла. Пушартан таврăнсан вара машинăсене, пушар сỹнтермелли хатĕрсене тасатса тирпейлемелле, йĕркелесе лартмалла, хамăрăн та çăвăнса тасалмалла, - терĕ Федор Владимирович хăйĕн ĕçĕпе паллаштарнă май. - Анчах та тепĕр чухне пĕр пушартан тỹрех тепĕр пушар сỹнтерме кайни те пулать".

Тепĕр чухне вара, дежурствăра мар пулсан та, çĕрле те килтен кайма тивет - пушар сỹнтерме чĕнсе илеççĕ. Кун пек ĕçре çемье тĕревĕ те пĕлтерĕшлĕ. Федор Михеева та çемьере хăйне ăнланни вăй хушать. Амăшĕ, Галина Сергеевна, ывăлĕн ĕçĕ хăрушлăхпа çыхăннăран пăлханнине хăйĕн ăшĕнче пытарма тăрăшать. Район библиотекин ача-пăча уйрăмĕнче тимлекен Алина Николаевнăпа Хĕрлĕ Чутай шкулĕнче иккĕмĕш класра вĕренекен Настя та мăшăрĕн тата ашшĕн ĕçĕ мĕн тери йывăр та яваплă пулнине ăнланаççĕ. Настя вара ашшĕ ĕçленĕ çĕрте темиçе те пулса курнă. Ачасен мĕншĕн шăрпăкпа выляма юраманнине хĕр пĕрчи питĕ лайăх пĕлет...

Пушар хуралĕнче ĕçленĕ хушăра Федор Михеев пĕрре кăна мар район тата республика шайĕнчи тĕрлĕ хисеп хучĕсемпе тав çырăвĕсене тивĕçнĕ. 2010 çулта вара ăна "Вăрман пушарĕсене сỹнтернĕшĕн" медальпе наградăланă.

Пурнăçра ĕçпе канăва çыхăнтарса пыма та пĕлмелле. Федор Михеев купăс калама, юрлама ăста. Футболпа та кăсăкланать вăл, çак вăййа çамрăксене явăçтарма тăрăшать.

"Пушар тип шар кăтартать", - тетпĕр пулин те чылай чухне инкек çынсен асăрханусăрлăхне пула тухнине манса каятпăр пулас. Кăçал пирĕн районта 24 пушар тухнă - пĕлтĕрхи çак вăхăтринчен тăватă пушар ытларах. Вут-çулăмра икĕ çын пурнăçĕ татăлнă, икĕ çын суранланнă, виçĕ çынна вара çăлса хăварнă. Çын вилнĕ тĕслĕхсем пушар сỹнтерекенсен кăмăлне пусараççĕ, паллах.

Харпăр хăй пурнăçĕшĕн пысăк хăрушлăх кăларса тăракан ĕçре тимлекенсен хăйне евĕр йăласем пурри пирки пĕрре кăна мар илтнĕ. Пушар хуралĕнче тимлекенсен те пур иккен кун пек йăла. Дежурство лăпкă ирттĕр, ун вăхăтĕнче инкек таврашĕ ан пултăр тесе вĕсем смена вăхăтĕнче пушмакĕсене тасатмаççĕ. Унсăр пуçне пушартан сыхлакан "Неопалимая Купина" турăша куç умĕнчех тытаççĕ.

А.КАРПОВА.