Вăрманăн çын пурнăçĕнче хакĕ те çук. Вăл материаллă ресурссен çăлкуçĕ кăна мар, çыннăн йĕри-таврари тата культурăпа истори хăтлăхĕн тĕп пайĕ. Унта халăхсен йăли-йĕрки тата культури йĕркеленет. Çулсерен сентябрĕн виççĕмĕш вырсарникунĕнче Вăрман ĕçченĕсен кунне паллă тăваççĕ (вăрман службин ĕçченĕсен про-фесси уявĕ). Уяв кунĕ тĕлне Чăвашстат республикăри вăрман ресурсĕсем пирки кĕске информаци хатĕрленĕ.

Чăваш Республикин Çутçанталăк министерстви пĕлтернĕ тăрăх, 2019 çулхи январĕн 1-мĕшĕ тĕлне вăрман фондне кĕрекен вăрмансен пĕтĕмĕшле лаптăкĕ 596,5 пин гектарпа танлашнă. Вăрмансем регионăн виççĕмĕш пайне йышăнаççĕ. Чăваш Енре уйрăмах çемçе çулçăллă йывăçсем чылай - 263,9 пин гектар. Лăсăллă вăрмансем 167,4 пин гектар йышăнаççĕ, хытă çулçăллисем - 122,9 пин гектар. Вуттăн пĕтĕмĕшле саппасĕ 83,9 миллион кубла метрпа тан.

Вăрмана сыхласа хăварас тĕллевпе 2018 çулта 597 гектар çинче ĕçсем пурнăçланă. Вĕсенчен вăрмансене искусствăл-лă майпа çĕнетнĕ - 401 гектар çинче, çутçанталăк мелĕпе - 186 гектар çинче, хутăш - 10 гектар çинче. Вăрмансене сиенлĕ организмсенчен хỹтĕлес тесе 3,4 пин гектар çинче профилактика мероприятийĕсем йĕркеленĕ, 1,4 пин гектар çинче - санитарипе сиплев ĕçĕсем. Вăрман питомникĕсенчи 5 пин гектар çинче ỹсен-тăран вăррине акнă.

Вăрмана çĕнетсе пынипе пĕрлех йывăçсене сиенлĕ хурт-кăпшанкă тĕп тăвать - 66 гектар. Тĕрлĕ чир те йывăçсене пĕтернĕ - 28 гектар. Вăрман пурлăхне сыхласа хăварас, хушас енĕпе вăрман службин ĕçченĕсем тăрăшаççĕ. 2018 çулта экономика сферин "Лесоводство и лесозаготовки" ĕçĕнче 641 çын тăрăшнă.

ЧĂВАШСТАТ.