Сентябрĕн 19-мĕшĕнче районти Культура çуртĕнче республикăри "Чун юрланă чух" фестиваль-конкурсăн районти тапхăрĕ иртрĕ. Ваттисен пултарулăхне хаклакан конкурса хутшăнакансем чылаййăн пулчĕç.

Чăваш автономине 100 çул тата Раççейри пенсионерсен союзне 25 çул çитнине халалланă конкурсăн девизĕ - "Манăн çулсем - манăн пуянлăх".

Жюри конкурс çĕнтерỹçисене пилĕк номинаципе палăртрĕ: "Хор ансамблĕсем" номинацире районти Культура çурчĕн ветерансен хорĕ (ертỹçи - Чăваш Республикин тава тивĕçлĕ культура ĕçченĕ Василий Романов) мала тухрĕ, "Ташă ансамблĕсем" номинацире Атнарти Культура çурчĕн "Çеçпĕл" ташă ушкăнĕ (ертỹçи - Чăваш Республикин тава тивĕçлĕ культура ĕçченĕ Владимир Кузьмин) палăрчĕ, "Илемлĕ вулав" номинацире - Александр Трофимов поэт, "Вокал" номинацире - Нина Маркова тата Надежда Архиповапа Валентина Романова дуэчĕ, "Вокал ансамблĕ" номинацире - "Питĕркассинчи Культура çурчĕн "Хăмăш" ансамблĕ (ертỹçи - Георгий Ярлов), "Чи лайăх юмореска" номинацире - Штанашри Культура çурчĕн пултарулăх ушкăнĕ, "Хуткупăсçă" номинацире - Леонид Аргандейкин.

Алĕç куравĕнче вара Зоя Перепелкинан, Зинаида Чернован тата Александрпа Анна Артюшкинсен ĕçĕсене палăртрĕç.

Конкурсăн районти тапхăрĕнче çĕнтернисем çывăх вăхăтра районсем хушшинчи конкурса хутшăнĕç.

А.ТИМОФЕЕВА.