Октябрĕн 25-мĕшĕнче районти ялхуçалăх ĕçченĕсем хăйсен професси уявне паллă турĕç. Пирĕн сĕтел çинчи çăкăр çĕр ĕçченĕ кашни кун ырми-канми тар тăкнăран пулать. Çавăнпа та ялхуçалăхĕнче тăрăшакан кашни çын мухтава тивĕç.

Районти Культура çуртĕнче çĕр ĕçченне чысласа иртнĕ уяв ялхуçалăх таварĕсен "Ылтăн кĕркунне" куравĕнчен пуçланчĕ. Унтан уява пухăннисене, сумлă хăнасене район администрацийĕн ялхуçалăх пайĕн начальникĕ Владимир Храмов тăхăр уйăх кăтартăвĕсемпе паллаштарчĕ.

Хыççăн хисеплĕ çĕр ĕçченĕсене професси уявĕпе Раççей Федерацийĕн Патшалăх Думин депутачĕ Николай Малов, Чăваш Республикин çын прависен уполномоченнăйĕ Надежда Прокопьева, Чăваш Республикин Патшалăх Канашĕн депутачĕн В.М.Павловăн пулăшуçи Андрей Данилов, район пуçлăхĕ Александр Степанов, район администрацийĕн пуçлăхĕ Александр Башкиров саламларĕç. Вĕсем ялхуçалăхĕнче тата продукци тирпейлекен промышленноçра ĕçлекенсене, нумай çул ырми-канми тăрăшакансене, ĕçре çитĕнỹ тунисене тĕрлĕ шайри наградăсем парса чысларĕç.

Нумай çул хушши тỹрĕ кăмăлпа ĕçленĕшĕн тата районăн агропромышленность комплексĕн аталанăвне тỹпе хывнăшăн "Нива" ЯХПК директорĕ Владимир Иванович Мурайкин, Илья Петрович Афанасьев водитель, Сергей Михайлович Майоров комбайнер, "Свобода" колхоз директорĕ Валериан Федотович Бромбин, Надежда Николаевна Иванова доярка тата Елена Зиновьевна Максимова ветеринари ĕçченĕ, "Коминтерн" ЯХПК директорĕ Альбина Борисовна Новикова, район пуçлăхĕ Александр Юрьевич Степанов, район администрацийĕн пуçлăхĕ Александр Викторович Башкиров Раççей Федерацийĕн Патшалăх Думин депутачĕн Николай Маловăн Тав çырăвне тивĕçрĕç.

Тỹрĕ кăмăлпа ĕçленĕшĕн тата агропромышленность комплексĕн аталанăвне тỹпе хывнăшăн "Свобода" колхоз трактористне Александр Никитич Токарева, Юрий Иванович Чертов инженера, "Четайское" ТЯО технологне Маргарита Валентиновна Тихонована, райадминистрацин ялхуçалăх пайĕн тĕп эксперт специалистне Алефтина Николаевна Дадюкована Чăваш Республикин Ялхуçалăх министерствин Хисеп грамотине парса чысларĕç.

А.КАРПОВА.