Январĕн 15-мĕшĕнче Мускаври "Манеж" тĕп курав залĕнче Раççей Президенчĕ Владимир Путин Федераци Пухăвне çулленхи Çырăвĕпе паллаштарчĕ. Ăна итлеме Федераци Канашĕн членĕсем, Патшалăх Думин депутачĕсем, Правительство членĕсем, çĕршывăн ĕç тăвакан влаç органĕсен представителĕсем, регион ертỹçисем, çав шутра Чăваш Республикин Пуçлăхĕ Михаил Игнатьев та, пухăннă.

Çĕршыв ертỹçи хăйĕн Çырăвĕнче яланхиллех çĕршывăн чи пĕлтерĕшлĕ ыйтăвĕсем çинче чарăнса тăнă, пуласлăхри тĕллевсене палăртса хăварнă.

Михаил ИГНАТЬЕВ, республика Пуçлăхĕ:

- Раççей Президенчĕ Владимир Путин регион ертỹçисем тата патшалăх влаçĕн органĕсем умне çакăн пек задача лартрĕ - çемье хаклăхĕсене упраса хăварасси. Çакна валли нумай нациллĕ Раççей халăхĕн ăс-хакăл пуянлăхне тĕпе хумалла, демографи лару-тăрăвне лайăхлатмалла, ачаллă çемьесене тĕрев ытларах памалла, халăхăн тупăш шайне ỹстермелле, экономикăна аталантармалла. Патшалăх енчен пулăшу сывлăх сыхлавне те, вĕрентĕве те пулĕ. Çак тĕллевсем валли, çĕршыв Президенчĕ каланă тăрăх, федераллă бюджетран хушма укçа уйăрĕç. Эпир те республикăра ку ыйтусене туллин пурнăçласа пырăпăр. Паянхи куна пирĕн пурнăçланă ĕçсем сахал мар, анчах тумалли те чылай. Раççей Правительствипе пĕрле ĕçлесе пырса эпир Раççей Президенчĕ палăртнă задачăсене хамăр республика территорийĕнче туллин пурнăçлăпăр.