Февралĕн 19-мĕшĕнче иртнĕ Министрсен Кабинечĕн черетлĕ ларăвĕнче ЧР Пуçлăхĕн тивĕçĕсене вăхăтлăх пурнăçлакан Олег Николаев пурăнма кирлĕ чи пĕчĕк виçе çинчен калакан саккуна улшăнусем кĕртесси пирки сăмах пуçарнă.

Аса илтеретпĕр, Правительствăн иртнĕ ларăвĕнче 2019 çулхи тăваттăмĕш кварталĕнчи пурăнма кирлĕ чи пĕчĕк виçине пĕчĕклетессине пăхса тухнăччĕ. Ун чухне Олег Алексеевич асăннă виçене чакарма юраманни пирки каланă - тĕлĕнмелле пулса тухать-çке: хаксем чакмаççĕ, "минимум" вара пĕчĕкленет... Çавăнпа та Олег Николаев Раççей саккунĕсем ирĕк панă чух пурăнмалли чи пĕчĕк виçе шайне унчченхи шайрах хăварма сĕннĕ. Ку виçе халăхăн тĕрлĕ категорине - чи малтанах сахал тупăшлисене - тỹлекен пособисен калăпăшне тỹррĕнех витĕм кỹрет.

Тивĕçлĕ саккун проектне хатĕрленĕ хыççăн ăна Министрсен Кабинечĕ ырланă. Ăна халĕ Патшалăх Канашĕнче пăхса тухмалли кăна юлать. Парламент сессийĕ февралĕн 28-мĕшĕнче иртет - проекта шăпах çавăн чухне пăхса тухĕç.

Надежда МИДАКОВА, виçĕ ача амăшĕ, Туктамăш ялĕ:

- Ку саккун проектне эпĕ ырлатăп кăна. Пурăнма кирлĕ чи пĕчĕк виçене чакарманни нумай çемьене тĕрлĕ тỹлевсем илсе тăма май парĕ.

Манăн та тăтăшах социаллă хỹтлĕх пайне çемьери çын пуçне тупăш сахал пулнине документсем тăратса çирĕплетме тивет. Çакна валли кашни виçĕ уйăх пуçне тĕрлĕ хут пухмалла, маншăн çакă питĕ кансĕр. Чăваш Республикин Пуçлăхĕн тивĕçĕсене вăхăтлăх пурнăçлакан Олег Николаев документсене виçĕ уйăхра пĕрре мар, çур çултан пухассине йĕркелеме сĕнни те мана килĕшрĕ. Манпа пĕр шухăшлисем районта нумай тесе шутлатăп.

Саккун проектне Патшалăх Канашĕнче ырласса шанатăп.