Хĕрлĕ Чутай салин Кивĕ центрĕнче вырнаçнă хуçалăх таварĕсен лавккинче савăт-сапаран пуçласа тĕрлĕ стройматериал таранах сутаççĕ. Кунта хуçалăхра кулленех кирлĕ чылай тавар пур. Лавккара тăрăшакан пикесем вара халăха яланах кăмăллă кĕтсе илеççĕ. Райпо тытăмне кĕрекен çак лавккара виççĕн тăрăшаççĕ.

Елена Сергеевна Филиппова (хĕр чухнехи хушамачĕ Замуткина) 1973 çулта Хĕрлĕ Чутай салинче çуралнă. Çемйипе Питĕркасси ялĕнче пурăнать. 2004 çултанпах райпо тытăмĕнче ĕçлет вăл. Ку лавккара вара 2008 çултанпа вăй хурать. Пилĕк çул ĕнтĕ Елена Сергеевна хуçалăх лавккин заведующийĕнче тимлет. Халăха кулленех кирлĕ таварпа тивĕçтерме тăрăшать вăл. Сентресем çинче пушă вырăн нихăçан та çук.

Хĕрлĕ Чутай салинче 1979 çулта çуралнă, хальхи вăхăтра çемйипе кунтах пурăнакан Галина Витальевна Лихутина та (хĕр чухнехи хушамачĕ Эзенкина) ку тытăмра 2013 çултанпа ĕçлет. Асăннă лавккара вăл икĕ çул ĕнтĕ килен-каякана кирлĕ тавар сĕнет, суйлама пулăшать, сĕнỹсем парать.

Вĕсене Галина Витальевна Сырова кулленех пулăшса пырать. Çĕнĕ Шупашкар хĕрĕ çемйипе Кỹпеш ялĕнче тĕпленнĕ. Ку лавккара вăл ултă çул вăй хурать ĕнтĕ. Сăмах май, Галина Витальевна хуçалăх лавккипе 2-мĕш номерлĕ гастроном тасалăхĕшĕн яваплă.

Хуçалăх лавккин ĕçченĕсем плана тăтăшах тултарса пыма тăрăшаççĕ.

Н.МИДАКОВА.