Раççей Федерацийĕн "Ветеринари çинчен" саккунĕпе килĕшỹллĕн тата республикăри Патшалăх ветеринари службин ертỹçин тивĕçĕсене вăхăтлăх пурнăçлаканăн представленине тĕпе хурса Горбатовка ялĕнче урнă чир тупса палăртнăран кунта мартăн 4-мĕшĕнчен пуçласа карантин туса хунă.

Çакăн пирки калакан йышăнăва мартăн 4-мĕшĕнче республика Пуçлăхĕн тивĕçĕсене вăхăтлăх пурнăçлакан Олег Николаев алă пусса çирĕплетнĕ.

Карантин хăçан пĕтессине çапла палăртаççĕ: выльăхсем урнă чирпе чирленине тупса палăртнă хыççăн икĕ уйăхран, анчах та çак хушăра пур профилактика мероприятине те туса ирттермелле.

Карантин вăхăтĕнче ялта килти выльăхсемпе сутă тума, кушаксемпе йытăсене ытти çĕртен илсе кĕртме е ялтан илсе тухма юрамасть. Тискер чĕрчунсене тытма та чарнă.

Штанаш ял тăрăхĕн администрацийĕнчен пĕлтернĕ тăрăх, Горбатовкăна карантина хупнин сăлтавĕ - çак кунсенче яла урнă тилĕ кĕрсе кайнинче, ун çине йытăсем тапăннинче. Кунта урнă чир вучахне путарассипе мерăсем йышăннă та ĕнтĕ.

Сăмах май, паянхи кун Горбатовка ялĕнче 11 килте пурăнакансем пур.

А.ТИМОФЕЕВА.