Çак сăнỹкерчĕкре - Турхан ялĕн çăви. Те кунта икĕ ял тăрăхĕнче - Мăн Этмен тата Тралькасси - вырнаçнă ялсенчи çынсене пытарнăран, те урăх сăлтавпа - çăвана тасатакан паянччен те тупăнман пулас. Ку ĕçе камăн тумаллине сỹтсе яваççĕ пулинех.

Хуть те мĕн калăр та, çак тасамарлăх кăçал, пĕр кун хушшинче пулса ларнăскер мар. Юр айĕнчен тухнă ĕнтĕ çак çỹп-çап купи, апла-тăк кунта пĕлтĕрех çапла тирпейсĕр пулнă.

Мăнкун çывхарса килет. Хыççăн вара эпир вилнисене асăнатпăр, çакна валли ятарлă кун, Радоница пур. Кăçал çĕршыври лару-тăрăва пула çăва çине кайма чарнă, çапах та çăвана, сăваплă вырăна, темле пулсан та таса тытмалла пулĕ? Чылай çĕрте çăвасене ял çыннисем пĕрле пухăнса тасатаççĕ. Кăçал хальлĕхе ку тĕлĕшпе чарусем пур, çапах та яваплисен тулса кайнă контейнерсене, вĕсем çăва çинче пулсан та, тасатсах, пăхсах тăмалла, çак ĕçе хальччен йĕркелесе яманнинчен тĕлĕнмелли кăна юлать.

Пирĕн çывăх çынсем ĕмĕрлĕх канлĕх тупнă вырăнсене таса тытасси пур ял тăрăхĕнчи çăвасене те пырса тивет, çак сăнỹкерчĕкре кăтартнине кăна мар.

Алина ИТТИ.