Чăваш Республикин 100 çулхи юбилейĕ çывхарнă май тата Аслă Отечественнăй вăрçăра фашистла Германие çапса аркатнăранпа 75 çул çитнине халалласа районти таврапĕлỹçĕсен председа телĕ, ĕç ветеранĕ Валерий Константинович Романов "Хĕрлĕчутайсен тымарĕ çирĕп" ятлă кĕнеке çырса кăларнă. Çĕнĕ кĕнекене Шупашкарта В.М.Савинкин ентешĕн "Своя типография" ТЯО-ра пичетленĕ. Кун çути курнă хытă хуплаш-каллă, 257 страницăллă кĕнекере хĕрлĕчутайсен тĕрлĕ тапхăрĕнчи пурнăçне тĕпе хурса çырнă статьясем пе хайлавсем кĕнĕ.

Кĕнеке умсăмахран пуçланать. Кунта пирĕн район халăхĕн утăмĕ, Чутай ялĕн ячĕ хăçан çырăнма тытăнни пирки Мускаври патшалăх архивĕн хучĕ пур, тата çынсен шухăш-кăмăлне уçса кăтартнă.

Малалли пайĕнче Тăван çĕршывăн Аслă вăрçинче пĕр тĕллевпе паттăррăн çапăçнă ентешсем çинчен çырнă статьясемпе Сăр юханшывĕ тăрăхĕнче окоп чавса, вăрман касса, хỹтĕлев чиккисене тума хутшăнса темĕн те тỹснĕ тыл ĕçченĕсен асаилĕвĕсене, хăрушă Чечен вăрçинче "леш тĕнчерен" чĕрĕ тухнине каласа кăтартнине тата 100 çул каяллахи Кăрмăш вăрçин суранĕ чĕрене ыраттарни çинчен вулама пулать. Кĕнекере шухăшласа кăларнă сăнарсем мар, кулленхи пурнăçри çынсем, куç умĕнчи район пуянлăхĕ.

Пирĕн районта пысăк чунлă та сăпайлă ĕç ветеранĕсемпе сал- так арăмĕсем, тава тивĕçлĕ ялхуçалăх ĕçченĕсем, пултаруллă та хисепе тивĕçнĕ учительсемпе врачсем, культурăпа спортра палăрмал-лах ỹсĕмсем тунă ентешсем пурăнаççĕ. Вĕсен пархатарлă ĕçĕ-хĕлĕ манăçа ан тухтăр тесе тăрăшнă. Çа вăн пекех кĕнекере таса чунлă пулма çылăхсене тасатма вĕрентекен Чутай чиркĕвĕн тата ялсен тахçанхи-авалхи историне кăтартса панă. Пултаруллă та ĕçчен, туслă та килĕшỹре пурăнакан, хурт-хăмăр енĕпе ĕçлекен çемьесем çинчен ырă сăмахсем çырса тĕрлĕ тĕслĕ сăнỹкерчĕксене вырнаçтарнă. Паянхи саманара та хĕрлĕчутайсен хастарĕ чакманнине, тымарĕ çирĕп пулнине тĕпе хурса çутатнă. Иртнине асра тытнине, шкулта ăс пухнă тапхăра аса илнине, хальхине хисеплесе хаклама вĕреннине те шута илме тăрăшнă. Çакă малашнехи пурнăçра та шанчăка çухатмасăр тĕрĕс те çирĕп утма кирлĕ пулĕ.