Çулсеренех июлĕн иккĕмĕш вырсарникунĕнче почта çыхăнăвĕнче ĕçлекенсем хăйсен професси уявне паллă тăваççĕ. Çак ятпа ĕçре палăрнисем тĕрлĕ наградăсене тивĕçеççĕ.

Акă Раççей почтин кунĕ ячĕпе тата профессири кăтартуллă ĕçсемшĕн Пантьăкри почта уйрăмĕн начальникĕ Наталья Владимировна Морозова, Хусанушкăнчи почта уйрăмĕн почтальонĕ Зоя Николаевна Семенова Раççей почтин Тав сăмахне, Утаркассинчи почта уйрăмĕн почтальонĕ Инна Ильинична Захарова Раççей почтин Хисеп грамотине тивĕçлĕ.

Почтальонсен ĕçĕ çăмăл мар. Хаçат-журналпа пĕрлех вĕсен сумкисем тĕрлĕ таварпа тулнă. Çакă уйрăмах пĕччен пурăнакан ватăсене çăмăллăх кỹрет. Лавккана тухса кĕме вăй-хал çитеймен пирки апат-çимĕç кам çитерсе парĕ? Паллах, почтальонсем. Вĕсем ватăсене яланах пулăшма хатĕр. Унпа пĕрлех почтальонсем район çыннисене çĕнĕ хыпарсемпе паллаштарма васкаççĕ. Çĕнĕ хыпарĕсем вара район тĕкĕрĕнче - "Пирĕн пурнăç" хаçатра - кун çути кураççĕ. Шăпах ăна сарас тĕллевпе тăрăшаççĕ почтальонсем. Хаçатра кашниех хăйне валли çĕннине тупатех. Кунта республикăри, районти лару-тăрупа паллашма пулать. Кил хуçи хĕрарăмĕсем те, пахчаçăсем те тĕрлĕ сĕнỹ-канашпа усă курма пултараççĕ. Çĕнĕ авторсен калавĕсем те кун çути кураççĕ кунта. Районти сăвăçсен пултарулăхĕпе те паллашма пулать.

Пур çыхăну уйрăмĕсен ĕçченĕсене те професси уявĕ ячĕпе саламлатпăр. Эсир район çыннисем патне çитерекен хыпарсем яланах ырă пулччăр, ĕçĕрсем ăнса пыччăр, малашне те район хаçатне çырăнтарма сирĕн сывлăхăрсем таса пулччăр, кăтартăвăрсем ỹсчĕр, ỹсĕмсен чикки ан пултăр.