Пурте пĕлеççĕ ĕнтĕ, алкоголизм преступлени тунипе тачă çыхăнура тăрать. Хаяр шĕвеке ытлашшипех тутансан вара "алă кĕçтет". Алкоголь çынна улăштарать, унăн "чи лайăх енĕсене" çиеле кăларать. Статистика кăтартнă тăрăх, çак улшăнусем пурте çынна преступлени çулĕ çине тăма пулăшаççĕ.

Кăçалхи çичĕ уйăх кăтартăвĕпе район территорийĕнче 52 преступление шута илнĕ, вĕсенчен 29-шне ỹсĕрле тунă. Çак преступленисене виçĕ категори çине уйăрма пулать: пĕрремĕшĕ çын сывлăхĕпе тата пурнăçĕпе çыхăннă, иккĕмĕшĕ - пурлăхпа, виççĕмĕшĕ - транспорт хатĕрĕпе кайнипе. Пĕрремĕш категорипе 14 преступлени пулнă, иккĕмĕшпе - 7, виççĕмĕшпе - 8.

Чи хăрушă çул-йĕрпе транспорт инкекĕсем те ỹсĕр водителе пула пулаççĕ. Кăшт эрех тутаннă çын хăйне ỹсĕр тесе шутламасть. Хăй çăмăллăнах руль умне ларать, машинăна хăвăртрах хăвалать. Çак инкек патне çитерме пултарать.

Чылай чухне преступлени тунă çынсем хăйсен айăпне сирме тăрăшаççĕ. Кун пекки унпа мĕнле пулма пул-тарнине ăнланмаççĕ, пуриншĕн те эрех айăплă теççĕ. Çынна çăвартан никам та эрех ямасть. Вăл ăна ăнлансах ĕçет. Ỹсĕрле преступлени тусан уголовлă явап тыттарнине асра тытмалла. Никама та айăпламасăр хăвармаççĕ.

В.ЯРАБАЕВ, районти полици уйрăмĕн участок уполномоченнăйĕсен тата çул çитменнисемпе ĕçлекенсен уйрăмĕн начальникĕ.