Ноябрĕн 2-мĕшĕнче Мускавра Чăваш автономи облаçне йĕркеленĕренпе 100 çул çитнине халалланă курав уçăлнă. Сăнỹкерчĕксен куравне Чăваш Республикин тата Мускав хулин правительствисем калаçса татăлнипе йĕркеленĕ - çĕршывăн тĕп хулинче чăваш культурин кунĕсем пыраççĕ.

Хальхи вăхăтра Мускавра пулнă май Трубная лапамри скверта йĕркеленĕ "Тăван çĕршыв" - "Родина" курава эпĕ те çитсе куртăм. Шăпах çав кун, ноябрĕн 3-мĕшĕнче, сăнỹкерчĕксен куравне официаллă майпа уçрĕç. Мероприятие Мускав хулин наци политикин департаменчĕн ертỹçи Виталий Сучков, Чăваш Республикин Министрсен Кабинечĕн Председателĕн çумĕ - Чăваш Республикин Раççей Президенчĕ çумĕнчи полномочиллĕ представителĕ Петр Чекмарев тата ытти ентешсем хутшăнчĕç. Курава уçнă саманта Чăваш Наци телевиденийĕн ĕçченĕсем ỹкерчĕç.

32 сăнỹкерчĕкрен тăракан куравра Чăваш Енĕн историйĕпе тата хальхи сăн-сăпачĕпе, йăли-йĕркипе, культурипе паллашма пулать. Кунта республикăн паллă вырăнĕсене те сăнланă, чăваш художникĕсен картинисем те пур.

Мускавра курав ноябрĕн 29-мĕшĕччен пулĕ. Унтан сăнỹкерчĕксене Шупашкарти Республика лапамне вырнаçтарĕç.

А.Карпова.