Республика Пуçлăхĕн Олег Николаевăн пуçарăвĕпе Тăван çĕршывăн Аслă вăрçине Çĕнтерỹпе вĕçленĕренпе 75 çул çитнĕ тĕле "Вăрçă ачисем çинчен" саккун йышăнни чăннипех те пысăк пĕлтерĕшлĕ. Ăна республикăра пурăнакан çĕр-çĕр çын кĕтнĕ. Саккунпа килĕшỹллĕн Чăваш Енри 70 пин çын "вăрçă ачи" статуса илнĕ. Малтанласа саккун вăрçă ачисене укçан пулăшу парассине тĕпе хуман. Çитес вăхăтра вара ку енĕпе улшăнусем пулĕç.

Паянхи кун тĕлне районта 475 "вăрçă ачи" удостоверени илнĕ.

Алена ЕЛИЗАРОВА, ЧР ĕçлев тата социаллă хỹтлĕх министрĕ:

- "Вăрçă ачисем" статус кирли куçкĕрет, çынсем çакна çирĕплетекен удостоверение илме килеççĕ, тав тăваççĕ. Юлашки вăхăтра кăна 26 пин ытла çынна документ патăмăр. 65 пин "вăрçă ачи" тĕрлĕ енлĕ социаллă пулăшу илсе тăрать. Çак шутра ĕç, тыл ветеранĕсен тỹлевĕсем, коммуналлă хуçалăхри ĕçсемшĕн паракан компенсацисем. Çавăн пекех "вăрçă ачисене" медицина учрежденийĕсенче, социаллă учрежденисенче черетсĕр йышăнаççĕ, вĕсем "Вега" центрта сывлăхне черет кĕтмесĕр çирĕплетме пултараççĕ. "Вăрçă ачисем çинчен" саккунра малтанласа пурлăх тĕлĕшĕнчен пулăшассине палăртман. Республика Пуçлăхĕ Олег Ни-колаев хушнипе çитес çултан вара укçан хавхалантарма пуçласшăн. Хальхи вăхăтра министерствăсемпе пĕрле саккуна улшăнусем кĕртес тĕлĕшпе ĕçлеме пуçларăмăр ĕнтĕ. Саккуна хушма пулăшу мерисемпе пуянлатассине ЧР Пуçлăхĕ çумĕнчи Общество канашĕн ларăвĕнче пăхса тухнă, вĕсене общество членĕсем пĕр саслăн пулса ырланă.