Ялти шкулсенче ăс пухакан ачасем те хуларисенчен кая мар аталанма пултарччăр тесе "Вĕрентỹ" наци проекчĕпе нумай ĕç пурнăçланă. Акă сентябрĕн 1-мĕшĕнче Питĕркассинчи вăтам шкулта асăннă наци проекчĕн "Современная школа" федераллă проекчĕ шайĕнче йĕркеленĕ "Точка роста" центр уçăлнă. Центр ертỹçи пулма биологипе хими учительне Людмила Ермолаевана шаннă.

Ку шкулта паянхи кун 70 яхăн ача ăс пухать. Шкул ачисем кунта малашне хальхи йышши оборудованипе усă курса цифрăпа гуманитари, çутçанталăк ăслăлăхĕсемпе технологи енĕпе пĕтĕмĕшле тĕп тата хушма пĕлỹ илме пултарĕç. Пахалăхлă пĕлỹ илме майсем кунта чăннипех те çителĕклĕ. Центра çỹренĕ май ачасем проект ĕç-хĕлĕпе тăтăшах аппаланĕç, çавна май вĕсем тĕрлĕ конкурссемпе олимпиадăсене хутшăнса çĕнтерес шанăç ỹсет. Центр нумай çамрăка пулас профессие суйласа илме пулăшасси те иккĕлентермест.

Палăртмалла, Питĕркассинчи шкулта хута кайнă "Точка роста" центр районта пиллĕкмĕш шутланать. Кун пек центрсем маларах Хĕрлĕ Чутайри, Атнарти, Мăн Этменти тата Çĕн Атикассинчи вăтам шкулсенче уçăлнă. Райадминистрацин вĕренỹ пайĕнчен пĕлтернĕ тăрăх, çитес çул хальхи йышши оборудованиллĕ кун пек центра Хусанушкăнчи шкулта та уçма палăртаççĕ.