Паян-ыран çураки вĕçленмелле. Хальлĕхе уй-хирте техника шавĕ илтĕнет-ха. Районти ялхуçалăх организацийĕсемпе фермер хуçалăхĕсенче юлашки лаптăксене "хуратаççĕ".

Район администрацийĕн ялхуçалăх пайĕ пĕлтернĕ тăрăх, июнь уйăхĕн 4-мĕшĕ тĕлне çурхи пĕрчĕллĕ тата пăрçа йышши культурăсене 3588 гектар çинче акнă, планпа - 4032 гектар (пĕлтĕрхи çак тапхăрта 2121 гектар, планпа - 3349 гектар). Вăл шутра 1166 гектар çурхи тулă, 1875 гектар урпа, 497 гектар сĕлĕ. 860 гектар çĕре хими мелĕпе çумласа тухнă, 290 гектар çĕре асăннă меслетпех хỹтĕленĕ. "Иккĕмĕш çăкăр" 12 гектар йышăнать (плана 100 проценчĕпех пурнăçланă). 1 гектар çĕр çинче пахча çимĕç акнă-лартнă. Пĕр çул ỹсекен курăксене 399 гектар акнă (пĕлтĕр - 125 гектар), нумай çул ỹсекеннисене - 321 гектар (пĕлтĕр - 20 гектар). Апатлăх кукуруз акнă лаптăк 475 гектар йышăнать (иртнĕ çул - 50 гектар). Унсăр пуçне 6 гектар хăмла çакнă. Пĕлтĕр "симĕс ылтăн" лаптăкĕ 3 гектарпа танлашнă.

Йăлана кĕнĕ тăрăх, лайăх кăтарту тунă, мала тухнă хуçалăхсене июнĕн 10-мĕшĕнче Хĕрлĕ Чутай салинче иртекен Акатуйра хисеп хучĕсем парса чыслĕç.

А.ВАСЮКОВА.