"Коминтерн" ЯХПК-ра çамрăксем сахал мар. Чи малтанах яш-кĕрĕме унта ĕç укçине вăхăтра тата лайăх тỹлени илĕртет, çавăнпах юлаççĕ те ялта. Акă Атнарта çуралнă Иван Матвеев шкулта вĕреннĕ вăхăтрах тăван хуçалăх ура çинче çирĕп тăнине, лайăх аталанса пынине, çитĕнсен хăй те кунта ĕçлеме пултарассине курса ỹснĕ. Ашшĕ-амăшĕ те çак хуçалăхрах ĕçлесе пенсие тухнă. Çавăнпах çамрăк хăйĕн пурнăçне ялхуçалăхĕпе çыхăнтарас тенĕ. Атнарти пĕтĕмĕшле пĕлỹ паракан вăтам шкула пĕтерсен Шупашкарта Чăваш патшалăх ялху-çалăх академийĕнче агронома вĕреннĕ.

Çав хушăрах çуллахи каникулта хĕрỹ ĕç вăхăтĕнче тăван хуçалăха пулăшма васканă. Пилĕк çул вырмара комбайнер пулăшуçи пулнă, каярахпа, документ илсен, хăй руль умне ларса тырă вырнă.

Пĕлтĕр Иван алла агроном дипломне илнĕ. Çуркуннехи призывпа вăл çĕршыв умĕнчи тивĕçне пурнăçлама кайнă. Атнар каччи Иркутскри артиллери çарĕнче службăра тăнă, водитель пулнă.

"Çар пурнăç шкулĕ тесе ахальтен каламаççĕ, унти опыт малашне кирлĕ пулать", - тет Ваня.

Салтакран çулла таврăнсанах вăл "Коминтерн" ЯХПК-на агронома вырнаçнă. Унччен хăйне шанма пулнине кăтартса панă çамрăк специалиста коллектива хаваспах йышăннă.

- Çамрăксем пысăк та çăмăл укçа шыраса хулана тараççĕ, эсĕ кунтах юлас терĕн-и?

- Эпĕ пачах апла шутламастăп. Укçа вăл темĕн чухлĕ ĕçлесе илсен те çитмест. Хĕрỹ ĕç вăхăтĕнче эпир кунта Мускавринчен те кая мар шалу илетпĕр. Халĕ вара хам вĕреннĕ профессипех опыт пухас тетĕп. - Агроном пулма килĕшет-и? - Паллах, унсăрăн эпĕ çакна вĕренмен те пулăттăм.

Сăмах май, çирĕп аталанакан "Коминтерн" ЯХПК-ра ĕçлеме кăмăл тăвас текенсем пайтах. Çапах çамрăк специалистсене çул пама тăрăшаççĕ хуçалăхра.

А.ЗАМУТКИНА.