Николай Иванович Трифонов 1923 çулта Мишеркасси ялĕнче çуралнă. Вăл сакăр çулта чухне ашшĕ вилнĕ. Çемьере асли пулнă май ун çине чылай йывăрлăх тиеннĕ.
Вуннăмĕш класс пĕтерсен, 18 çулхискер, Николай Иванович Тăван çĕршыва нимĕç фашисчĕсенчен хỹтĕлеме тухса кайнă. 1942 çулхи октябрь уйăхĕнче Кавказри Моздок хули патĕнче наступлени пынă вăхăтра тăшман дзочĕн амбразурине хупланă чух вăл йывăр аманнă. Госпитальте унăн икĕ аллине те татма тивнĕ.
Анчах Н.Трифонов усăсăр пурăнасшăн пулман. Вăл икĕ чавса тунипе ручка тытса çырма вĕреннĕ, ытти ĕçсене тума хăнăхнă.
Вăрçăран вăл 1943 çулта виççĕмĕш степеньлĕ Мухтав орденĕпе таврăннă. Пĕрремĕш ушкăн инваличĕ пулнă пулин те, ахаль ларман, вулав çурчĕн заведующийĕ, ял канашĕн секретарĕ, бригадир, ферма заведующийĕ пулнă. Хушнă ĕçе яланах вăхăтра тата тỹрĕ кăмăлпа пурнăçланă.
Николай Иванович Трифонов Мария мăшăрĕпе çичĕ ачана кун çути парнеленĕ. Кăçал Мария Трифонова, мĕн тивĕçлĕ канăва тухиччен ырми-канми колхозра ĕçленĕскер, 95 çул тултарчĕ. Николай Иванович вара 1996 çулхи сентябрĕн 23-мĕшĕнче вилнĕ.
Николай Трифоновăн кун-çулĕ - йывăрлăха парăнман, пĕтĕм вăй-хăватне Тăван çĕршыва панă паттăрсен кун-çулĕпе тан.