Тăватă çула тăсăлнă Аслă Отечественнăй вăрçăра нимĕç çарĕсем пирĕн çĕршыва питĕ пысăк тăкак кỹнĕ. Фашистсем 1710 хулапа поселока, 70 пин яла, 32 пин заводпа фабрикăна, 70 пин колхоза аркатнă. Вăрçă çулĕсенче 30 миллиона яхăн совет çынни вилнĕ.

Мишеркасси ялĕнчен Тăван çĕршыва хỹтĕлеме 204 арçын кайнă, 97-шĕ вăрçăра вилнĕ. 65 хĕрарăм упăшкасăр, 164 ача ашшĕсĕр юлнă. Упăшкисем вăрçа кайнă чух йывăр çын пулнă хĕрарăмсем 40 ача çуратнă.

Вăрçă çулĕсенче пĕтĕм йывăрлăх хĕрарăмсемпе ачасем тата ватăсем çине тиеннĕ. Салтак арăмĕсем килти хуçалăха та саланма паман, ачисене те выçса вилесрен çăлса хăварма тăрăшнă.

Эпĕ - вăрçăра вилнĕ салтак ывăлĕ, часах 90 çул тултаратăп. Аслă Отечественнăй вăрçă çулĕсене лайăх астăватăп.

Аса илсен, вăрçă хĕн-асапне мĕнле тỹссе ирттернинчен тĕлĕнетĕп. Пирĕн атте Яков Дмитриевич Вазяков 1904 çулта çуралнă. Вазяков аслă сержант 1944 çулта нимĕç фашисчĕсемпе паттăррăн çапăçса вилнĕ.

Вăрçă тухнă çул кỹршĕ хĕрарăмĕн айăпне пула тухнă пушарта пирĕн кил-çурт тăр кăнтăрлах вутра кĕлленчĕ. Пĕтĕм йывăрлăх анне çине тиенчĕ. Куççуль юхтарса вăл кăмака купаларĕ, алла пуртă тытса çенĕк майларĕ. Килти хуçалăха та саланма памарĕ апай - Акулина Степановна Вазякова.Чи йывăрри выçлăхра асапланни пулчĕ. Анне тăрăшнипе кăна вилĕмрен çăлăнса юлтăмăр...

Иван ВАЗЯКОВ, Мишеркасси ялĕ.