Чăваш автономи облаçне йĕркеленĕренпе - 100 çул çитнине халалласа республикăра онлайн мелĕпе "Славься, Чувашия!" юрă марафонĕ пырать.
Марафон майăн 26-мĕшĕнче пирĕн районта пуçланнă, июнĕн 24- мĕшĕнче вĕçленет. Кашни кунах ытти районсемпе хуласем те марафона хутшăнса пыраççĕ. Чи юлашкинчен Шупашкар пирки видеоролик тухĕ.
Хĕрлĕ Чутай районĕ пирки калакан видеороликпа Чăваш Республикин Культура министерствин сайтĕнче (http:culture.cap.ru) паллашма пулать. Видеоролик вĕçĕнче Хĕрлĕ Чутай районĕн "Чаплăлан, тăван тавралăх!" (кĕвви - П.Федоровăн, сăмахĕсем - Петĕр Ялкирĕн) гимнĕ янăрать - ăна Чăваш Республикин тава тивĕçлĕ культура ĕçченĕ Александр Самсонов тата районти фольклор ушкăнĕсем юрлаççĕ. Сăмах май, гимн юрланă видео район хаçачĕн социаллă сетьсенчи ("Одноклассники", "ВКонтакте", "Инстаграм") ушкăнĕсенче те пур.
"Славься, Чувашия!" марафонăн тĕп тĕллевĕ - муниципаллă районсемпе хуласен тĕп символикипе, паллă вырăнĕсемпе паллаштарасси, муниципалитетсен çитĕнĕвĕсене çутатасси, Чăваш автономи облаçне йĕркеленĕренпе 100 çул çитнĕ май çитĕнекен ăрăва патриотла воспитани парасси.
Марафона #ВместеПĕрле хештег пĕрлештерсе тăрать. Акцие пĕтĕмлетсе пур районпа хула пĕрле Чăваш Республикин Гимнне юрлĕç.