Район центрĕнче ачасемпе аслисем валли те уçăлса çỹреме тата канма вырăн сахал пулни пирки эпир пĕрре кăна мар калаçнă. Çавăнпа та салари Пĕрремĕш Çамрăксен урамĕнче çуран çỹремелли аллея тума шутлани пире пурне тесавăнтарчĕ. "Волгаинвестстрой" ТЯО ĕçченĕсем тата юлашки кунсенче район администрацийĕнче, ача садĕнче ĕçлекенсем тăрăшнипе Республика кунĕнче çĕнĕ аллея хута кайрĕ.
Тĕрĕссипе, аллея тени кăна тĕрĕсех те мар пулĕ. Ку - питĕ меллĕ те хăтлă кану вырăнĕ, спорт тата ача-пăча площадки. Брусчатка сарса тунă çуран çỹремелли вырăн айккипе саксем лартса тухнă, кунтах беседка та пур. Ача-пăчана савăнмалăх - чуччусем, велосипедпа тата скейтсемпе ярăнмалли вырăн. Сывлăха çирĕплетме - ятарлă резина сарса тунă вырăнта тренажерсем, турниксем.
Сăмах май, Республика кунне уявлама района килсе çитнĕ Олег Николаев турниксен çирĕплĕхне хăй тĕрĕслесе пăхрĕ - пĕр-икĕ хутчен туртăнса илчĕ. Вăл тин кăна туса лартнă спорт хатĕрĕсемпе кăмăллă юлнине палăртрĕ. Кану вырăнне çавăн пекех чечек клумбисем, йывăçсемпе тĕмсем илем кỹреççĕ. Часах кунта газон симĕсленме пуçлĕ. Каçхи вăхăтра вара аллея ятарласа лартса тухнă çĕнĕ хунарсен çутипе çуталĕ...
А.КАРПОВА.