Кăçал районта Валериан Толстов-Атнарский çуралнăранпа 105 çул çитнине халалланă мероприятисем тăтăшах иртеççĕ.

Акă мартăн 13-мĕшĕнче "Çын тата çутçанталăк" халăх музейĕнче районти таврапĕлỹ музейне йĕркеленĕ ученăй-педагога халалласа наукăпа практика конференцийĕ иртнĕ.

"Чăн-чăн учительсене вĕренекенĕсем манмаççĕ" ятпа иртнĕ мероприятие "Хĕвел" ача садне çỹрекенсем, районти шкулсенче вĕренекенсемпе педагогсем, райадминистрацин вĕренỹ тата культура тытăмĕнче ĕçлекенсем, таврапĕлỹçĕсем тата ыттисем хутшăннă.

Пухăннисем Валериан Толстов-Атнарский çинчен документлă кино пăхнă, унтан шкул ачисем паллă ентешĕмĕр пирки докладсем вуласа панă. Наукăпа практика конференцине пĕтĕмлетнĕ май çĕнтерỹçĕсене палăртнă.

Пĕрремĕш вырăна Питĕркасси шкулĕнче 9-мĕш класра вĕренекен Евгений Хохлов (ертỹçи - Альбина Владимировна Фадеева) тухнă. Иккĕмĕш вырăн Хĕрлĕ Чутай шкулĕнче 9 А класра вĕренекен Александра Никифорова (ертỹçи - Галина Алексеевна Бровкина) тата Мишеркасси шкулĕнче 9-мĕш класра вĕренекен Анастасия Макарова (ертỹçи - Лидия Юрьевна Яруськина) йышăннă. Виççĕмĕш вырăна Тури Çĕрпỹкасси шкулĕнче 8-мĕш класра вĕренекен Анастасия Яковлева (ертỹçи - Владимир Анатольевич Кашкиров) тата Хусанушкăнь шкулĕнче 7-мĕш класра вĕренекен Юлия Воробьева (ертỹçи - Светлана Вячеславовна Яруткина) пайланă. 

А.ТИМОФЕЕВА.