Нумай енлĕ ĕçлекен культура центрĕн районти Культура çурчĕ пĕлтĕр культура учрежденийĕсен пурлăхпа техника никĕсне çирĕплетме палăртакан проектсен конкурсĕнче çĕнтерỹçĕсен йышне кĕчĕ. "Тăван ен культури" федераллă проекта пула районти Культура çурчĕ кĕвĕ хатĕрĕсемпе тата сцена тумтирĕпе пуянланчĕ. "Чайка" купăс, "Этюд" баян, радио тата акустика тытăмĕ, цифрăллă фортепиано, пюпитр, тĕрлĕ сĕтел-пукан илни Культура çурчĕн техника никĕсне самай пуянлатаççĕ. Çитес вăхăтра хĕрарăмсемпе арçынсен чăваш тĕрриллĕ кĕписене, масмаксене илсе çитермелле.

В.Г.Толстов-Атнарский ячĕпе хисепленекен "Çын тата çутçанталăк" халăх музейĕ республикăра иртнĕ конкурса хутшăнса "Чи лайăх музей" ята тивĕçрĕ, ăна 175 пин тенкĕлĕх сертификат панă. Палăртнă укçа-тенкĕпе музейра сĕтел-пукан, курав стенчĕсене, компьютер сĕтелĕсене, шкапсене çĕнетрĕç. Çапла майпа культура учрежденийĕсем çĕнĕ хатĕрсемпе усă курса çынсене пахалăхлă пулăшупа тивĕçтерĕç, районта культура сферин çирĕп никĕсне йĕркелеме пултарĕç.

М.МАМУТКИНА.