Пĕтĕм Раççейри халăх фрончĕн эксперчĕсем çĕршыв Правительствин сывлăх сыхлавне кадрсемпе тивĕçтересси пирки калакан докладне тишкернĕ. "Халăх фрончĕ" общество организацийĕ Раççей Сывлăх сыхлавĕн министерстви тата РФ Правительстви тухтăрсемпе медицина сестрисем çителĕклĕ пулччăр тесе чылай ĕç тунине палăртнă, анчах та ку çителĕксĕр пулнине каланă. Тухтăрсем уйрăмах ялсенче çитменнине палăртнă май "Халăх фрончĕн" эксперчĕсем çакна асăрханă: пĕлтĕрхипе танлаштарсан тухтăрсен пĕтĕмĕшле шучĕ 28,5 пин чухлĕ чакнă, вăтам медицина персоналĕн шучĕ - 108 пин çын чухлĕ. Çакна та куçран вĕçертмен _ амбулаторипе поликлиника учрежденийĕсенче,васкавлă пулăшу уйрăмĕсенче медицина сотрудникĕсем çитмеççĕ пулсан, стационарсенче вĕсем ытлашшипех (9,7 пин çын). Яллă вырăнсенче вăтам медицина ĕçченĕсен шучĕ 1 пин те 600 çын таран сахалланнă. 2015-2016 çулсенче медицина учрежденийĕсем хупăннăран е штатсене кĕскетнĕрен 53 пине яхăн медицина сотрудникне ĕçрен кăларнă. Çак лару-тăрăва уçăмлатас тесе "Халăх фрончĕн" активисчĕсем ятарлă программа хатĕрлемелли пирки йышăну тунă. Пĕтĕм Раççейри халăх фрончĕн Тĕп штабĕн членĕ, ачасен васкавлă хирургийĕн тата травматологийĕн Наукăпа тĕпчев институчĕн директорĕ Леонид Рошаль пĕлтернĕ тăрăх, ятарлă программа больницăсене ĕçченсемпе тивĕçтерессине тапхăрăн-тапхăрăн пурнăçласа пыма пулăшĕ. Паллă тухтăр чи малтанах медицина институчĕсенчен бюджет шайĕнче (тỹлевсĕр) вĕренсе тухнисене медицина учрежденийĕсене направленисемпе ямалла тесе шутлать. Çапла майпа ялсенче тухтăрсем çитмен ыйтăва татса пама пулĕ. А.ТИМОФЕЕВА.