Кăçалхи вырман чун-чĕрене çĕклентерекен енĕ - районшăн пысăк тупăш - 12741 тонна тĕштырă - илни. Çак сăмахсене калама çеç лайăх. Çĕр ĕçченĕн пысăк тухăçшăн çулталăкĕпех вăй хума тиврĕ. Аса илтерер-ха. Кăçал çуракине виçĕ эрне кая юлса тухрăмăр. Кайран çумăрсем пуçланчĕç. Анчах ертỹçĕсем ĕçе тĕрĕс планласа пынине, çĕр ĕçченĕсем хăйсен тивĕçне тăрăшса пурнăçланине тата çутçанталăк майĕсемпе пĕл-се усă курнипе тыр-пул ăнса пулчĕ. Кăçал районта ỹсентăранпа çĕнĕ тăватă предприяти ĕçлеме пуçларĕ. Вĕсем: Ю.Самарин фермер хуçалăхĕ (600 га), "СТК 21" (300 га), "Заготовки" ТЯО (69 га) тата Д.Кузнецов фермер хуçалăхĕ (70 га). Ялхуçалăх ĕçченĕсен уявĕнче кăçалхи тăхăр уйăх кăтартăвĕсемпе хресченпе фермер хуçалăхĕсем хуш-шинче ялхуçалăх продукцине нумай туса илнĕшĕн Ю.Самарин фермера район администрацийĕн Хисеп грамотипе наградăларĕç.

- Тыр-пул туса илесси çăмăл ĕç мар, уйрăмах пушă çĕр çине килсе кĕрсен. Анчах та ял ĕçченĕсен тăрăшулăхне, районти хуçалăхсем пĕр-пĕрне пулăшма хатĕр пулнипе, ăнланса ĕçленипе йывăрлăхсене çĕнтерме пултартăмăр, - терĕ сăмах каланă май Юрий Самарин.

Тачă çыхăнса ĕçленĕшĕн тав сăмахĕсене Санкт-Петербургри вăр-лăхпа техника комплексĕн ("СТК 21") генеральнăй директорĕ Александр Бечин та каларĕ. Вĕсен хуçалăхне тыр-пул пухса кĕртме пулăшнă районти ĕçтешĕсене - "Коминтерн" ертỹçине Альбина Новикована, Юрий Самарина тата Дмитрий Кузнецова - Тав сăмахĕпе тата парнесемпе чысларĕ. Район администрацийĕ те района килсе пушă выртакан çĕрсене çаврăнăша кĕртнĕ çĕр ĕçченĕсем умĕнче парăмра юлмарĕ. "СТК 21" ТЯО-н генеральнăй директорне Александр Бечина тата хуçалăхăн агрономне Любовь Стафика тав туса Хисеп грамотипе тата парнесемпе наградăларĕ.

А.ДМИТРИЕВА.