Анне! Ҫак ят чи ҫывăх,

Чи хаклă ҫĕр ҫинче.

Пурнать вăл ĕмĕр сывă

Кашни ҫын чĕринче.

             А.Воробьев.

Манăн чи юратнă ҫын вăл, паллах, анне.  Ăна Ольга Николаевна Макарова тесе чĕнеҫҫĕ. Вăл маншăн чи хитре, чи лайăх хĕрарăм. Унăн хура ҫутӑрах тĕслĕ ҫӳҫĕ ҫав тери кăпăшка та хулăн. Ăна вăл тĕплĕн турать те илемлĕн пуҫтарса хурать. Манăн аннен куҫĕ хура тĕслĕ, куҫ харшийĕсем те хура. Анне ҫынпа калаҫнă чухне куҫран пăхса калаҫать.

Анне алли ҫав тери ачаш та ҫемҫе. Ҫав алăсем тем те тума пĕлеҫҫĕ: ĕне сăваҫҫĕ, апат пĕҫереҫҫĕ, кĕпе-йĕм ҫăваҫҫĕ, ҫăм арлаҫҫĕ, алсиш-нуски ҫыхаҫҫĕ, пахча ҫимĕҫ ҫитĕнтереҫҫĕ, пире пуҫран ачашлама та манмаҫҫĕ. Вăл мана та, аппана та, пиччене те пĕрешкел юратать.

Пирĕн анне килти хăтлăхшăн ҫав тери тăрăшать. Вăл чечексем ӳстерме питĕ юратать. Пирĕн пӳртре тем тĕрлĕ чечек ӳсет. Вĕсене анне юратса пăхать. Анне пире те чечексене юратма вĕрентет. Пирĕн те анне пек пулас килет.

Манăн анне - ĕҫчен ҫын. Кахал ҫын-семпе пĕр чĕлхе тупаймасть вăл. Тилĕ пек чее те йăпăлти чĕлхеллĕ ҫынсене чăтма пултараймасть. Кашни кун анне пĕр канми ĕҫлет. Эпир ăна пулăшма тăрăшатпăр: урай, чашăк-тирĕк ҫăватпăр, кил-ҫурта тирпейлетпĕр тата ытти ĕҫсене те савăнсах тăватпăр. Вăл пире те хăйĕн пекех пулма, ĕҫе юратма, тӳрĕ кăмăллă ҫын пулма вĕрентет. Анне пире вĕренӳре те пулăшать, тĕрлĕрен канаш, сĕнӳ парать. Пирĕн анне хамăр Тăван ҫĕршыва юратать. Пире те хамăр ӳснĕ кил-ҫурта, тăван яла, хамăр урамри ем-ешĕл йывăҫсене, укăлча ҫумĕнчен пуҫланакан уй-хире, тинĕс евĕр курăнакан тыр-пул уйĕсене юратма вĕрентет. Анне пире тата ҫынлăхăн чи лайăх енĕсене ăша хывма, ырă ĕҫсем тума вĕрентет, пурнăҫра тĕрĕс ҫул суйласа илме пулăшать. Анне тивлечĕпе хавхаланса, хамăршăн чи хаклă ҫыннăмăра асра тытса эпир пурнăҫра темле кăткăс лару-тăрăва та ҫĕнме вăй-хал ҫитерĕпĕр.

Аннеҫĕм! Мĕнле телей тĕнчере эсĕ пурри! Сансăр хĕвел те ăшăтмасть, уйăх та ҫутатмасть, чечек те ҫеҫкине ҫурмасть. Эпĕ хам юратнă аннене ҫирĕп сывлăх, телей сунатăп.

Виктория Вазякова, Мăн Этмен шкулĕ.