Июнĕн 22-мĕшĕнче эпир Асăнупа хурлану кунне паллă тăватпăр. Вăрçă пуçланнă кун умĕн манăн фронтра пуç хунисене аса илес килет.
Мишеркасси лавкки патĕнчи пурне те курăнмалла вырнаçнă палăк çине "Никама та манман, нимĕн те манăçман" тесе çырнă. Вăрçăра пуçĕсене хунă ентешсене чысласа лартнă çак палăк патĕнче ял çыннисем хăйсен тăванĕсене асăнса мăнаçланаççĕ.
Пантьăк тăрăхĕнчи ялсенчен Тăван çĕршывăн Аслă вăрçине 1042 ентеш хутшăннă, çапăçу хирĕнче паттăррăн кĕрешсе 509 салтак хăйсен пурнăçĕсене панă. Вăл шутран Утаркасси ялĕнчен - 110 çын, Мишеркассинчен - 97, Хватукассинчен - 86, Пантьăкран - 42, Хирлỹкасси, Ирчкасси, Лоба ялĕсенчен 145 çын вăрçăран таврăнайман.
Хăш-пĕр çемьесенчен 3-4-шар пĕртăван çапăçу хирĕнче выртса юлнă. Ун пеккисем Утаркасси ялĕнчи Иван, Николай, Егор, Павел Ивановсем, Александр, Василий, Петр Канячкинсем, Алексей, Иван, Дмитрий Сидоровсем; Мишеркассинчи Петр, Василий, Иван Даниловсем, Василий, Федор, Иван Захаровсем, Ермей, Дмитрий, Михаил Крышкинсем, Иван, Николай, Фадей Шуньковсем; Хватукассинчи Михаил, Кирилл, Семен Крыжайкинсем, Иван, Василий, Александр Федотовсем, Михаил, Иван, Василий Музяковсем; Пантьăкри Александрпа Федор Дьячковсем, Иванпа Петр Соломинсем; Пухтанкассинчи Иванпа Федор Ивановсем, Максимпа Семен Падейкинсем; Хирлỹкассинчи Михаил, Николай, Петр Арбузовсем, Павел, Николай, Иван Воронцовсем, Арсений, Иван, Николай Гераськинсем, Афанасий, Василий, Михаил Морозовсем, Арсентий, Василий, Петр Юрейкинсем.
Вăрçăра вилнĕ пĕртăвансен ячĕсене асăнса вĕсене нихăçан та манмастпăр, Тăван çĕршыв ирĕклĕхĕшĕн хăйсен пурнăçĕсене панă ентеш-салтаксене ĕмĕр-ĕмĕр мухтав!
Иван ВАЗЯКОВ, Мишеркасси ялĕ.