Иртнĕ çулхи ĕç кăтартăвĕсене пĕтĕмлетнĕ май Акатуй умĕн районти Хисеп хăмине çĕнетнĕ. Ун çинче - тĕрлĕ сферăра тăрăшакан 15 çын сăнĕ.

Хисепе тивĕçнисем хушшинче ачасемпе ĕçлекен те, выльăх пăхакан та, культурăра е сывлăх сыхлавĕнче, пушар хуралĕнче тимлекен те пур. Вĕсем пурте хăйсен ĕçĕпе ырă тĕслĕх кăтартаççĕ, район пурнăçне лайăхлатма тăрăшаççĕ.

Хисепе тивĕçнисен шутĕнче: "Свобода" колхоз председателĕ Валериан Федотович Бромбин, "Хастар" физкультурăпа спорт комплексĕн тренер-преподавателĕ Юрий Анатольевич Бронюков, Атнарти ял библиотекин тĕп библиотекарĕ Ангелина Петровна Козлова, Утаркассинчи почта уйрăмĕн почтальонĕ Валентина Николаевна Микушкина, "Жилсервис" ТЯО-н аслă слесарĕ Федор Тимофеевич Михеев, район больницин неврологи кабинечĕн медицина сестри Зоя Александровна Музякова, Хĕрлĕ Чутайри вăтам шкулăн физкультура учителĕ Эдуард Васильевич Романов, районти полици уйрăмĕн аслă участковăйĕ Игорь Валентинович Сатлайкин, Хăмарккари лавкка заведующийĕ Алена Харитоновна Семенова, "Коминтерн" ЯХПК-ра сысна пăхакан Лариса Александровна Смалайкина, Хĕрлĕ Чутайри газ участокĕн аварипе диспетчер службин водителĕ Валерий Васильевич Удяков, 33-мĕш номерлĕ пушар чаçĕн водителĕ Эдуард Вадимович Федоров, "Нива" ЯХПК-ра выльăх пăхакан Сергей Васильевич Храмов, "Четайское" ТЯО-н генеральнăй директорĕ Юрий Осипович Яндайкин, Березовкăри ваттисене тата инвалидсене стационарлă пулăшу паракан уйрăм заведующийĕ Зоя Степановна Ярлова.

Ĕçчен те пултаруллă çынсем ыттисене те тăрăшарах ĕçлеме хавхалантарса пыраççĕ.

А.КАРПОВА.