Июнĕн 20-мĕшĕнче республикăри чăваш чĕлхипе литературине вĕрентекенсем тата пěтěмěшле пěлý паракан учреждени  ертýçисем «Пĕрлĕхре – вăй» регионсем хушшинчи форума хутшăннă. Вăл Çĕрпÿ районĕнче иртнě.

Вĕрентекенсем педагогикăри пултарулăхпа паллаштарас тĕллевпе курав-презентаци хатĕрленĕ. Çавăн пекех «çавра сĕтеле» хутшăнса тăван чĕлхене вĕрентессипе çыхăннă ыйтусене сÿтсе явнă. Форума онлайн мелпе Пушкăрт, Тутар республикисенчи, Чĕмпĕр тата Пенза облаçĕсенчи йăхташăмăрсем те хутшăннă.

Палăртмалла, район хаçачĕн редакци ĕçченĕсем те чăвашлăха упрас, аталантарас ыйтăва пысăк тимлĕх уйăраççĕ. Çак тĕллевпе кашни çулах хаçат страницисенче тĕрлĕ ятпа социаллă пĕлтерĕшлĕ проект пурнăçланать. Сăмахран, пĕлтĕр вăл "Чăваш ачи, сассуна пар!" ятпа тухса тăчĕ, кăçал – "Çамрăк журналист". Çак проекта кун çути кăтартас ĕçре Мăн Этмен шкул ачисем активлăхпа палăраççĕ. Нумаях пулмасть эпир, редакци ĕçченĕсем, Мăн Этмен шкулĕнче вĕренекен ачасемпе тĕл пултăмăр. Калаçу тăван чĕлхемĕр пирки пычĕ. Ачасем хаçат историйĕнчен пуçласа журналистсен ĕç укçи таранах кăсăкланса чылай ыйту хуравне илчĕç.

Мăн Этмен шкулĕнче чăвашлăх аталанни сисĕнет, кунта пурте чăвашлах калаçаççĕ, районта чăвашла тухса тăракан хаçатпа туслă пулни те çакнах çирĕплетет.