Мартăн 31-мĕшĕнче Шупашкарти Наци библиотекинче республикăри таврапĕлỹçĕсен пысăк пухăвĕ иртнĕ. Унта пирĕн район делегацийĕ те хутшăннă. Пухура иртнĕ çулхи ĕç-хĕле тишкернĕ май таврапĕлỹçĕсене наградăсем парса чысланă. Хисепе тивĕçнисем хушшинче пирĕн район таврапĕлỹçисем те пулнă.

2017 çулта кăларнă кĕнекесемшĕн Николай Иванович Полозин ("Краткая энциклопедия просвещения Красночетайского края" кăларăм редакторĕ) Михаил Тинехпи ячĕллĕ Диплома тивĕçнĕ; Лев Васильевич Медведев ("Вскормленные соком родных берез" кĕнеке авторĕ) - Куçма Элле ячĕллĕ Диплома; Александр Петрович Трофимов ("Турхан шкулĕ" кĕнеке авторĕ) - Алексей Милли ячĕллĕ Диплома.

Тăван тавралăха тĕпченĕшĕн тата пĕлĕвĕсене халăх хушшинче сарнăшăн Лев Васильевич Медведева "Чăваш ăс-хакăлĕн тава тивĕçлĕ ăсти" хисеплĕ ят панă. Валерий Константинович Романовпа Александр Петрович Трофимов "Хисеплĕ таврапĕлỹçĕ" ята тивĕçнĕ.

Чăваш таврапĕлỹçисен Союзĕн Хисеп грамотине районти "Çын тата çутçанталăк" халăх музейĕн Пантьăкри филиалĕн методистне Николай Иванович Трифонова, çавăн пекех Галина Вячеславовна Зотовапа Светлана Вячеславовна Яруткина таврапĕлỹçĕсене парса чысланă.

Пухура Хĕрлĕ Чутай районĕн таврапĕлỹçисем республикăри чи лайăх виçĕ район шутĕнче пулнине палăртнă.

А.ТИМОФЕЕВА.