ЧР Министрсен Кабинечĕн йышăнăвĕпе килĕшỹллĕн, кăçалхи апрелĕн 28-мĕшĕнчен пуçласа республикăра пушара хирĕç ятарлă режим çирĕплетнĕ. Районти Мăн Этмен, Хĕрлĕ Чутай тата Кив Атикасси ял тăрăхĕсен администрацийĕсем те пушар хăрушлăхĕ пысăк пулнă май асăннă режима туса хунă.

Ялхуçалăх пĕлтерĕшлĕ е саппас çĕрсем çинчи типĕ курăка çунтарассине пирĕн çĕршывра саккунпа чарнă. Çакна РФ Правительствин ятарлă йышăнăвĕ палăртнă. Документпа килĕшỹллĕн, асăннă вырăнсенче вутпа уççăн усă курма юрамасть. Пушар хăрушсăрлăхĕн правилисене пăхăнманнисене административлă тата уголовлă явап тыттараççĕ.

Шел пулин те, район территорийĕнче типĕ курăка çунтарнă тĕслĕхсем кашни çулах пулаççĕ. Кăçал та пушар хурал ĕçченĕсем типĕ курăк çунакан вырăнсенче пĕрре кăна мар вутпа кĕрешрĕç. Айăпĕ ытларах чухне - çынсенче. Вут тивертнĕ курăка тимлĕхсĕр хăварма юрамасть. Типĕ курăк çине пăрахнă пирус тĕпĕ те вут-çулăм алхаснин сăлтавĕ пулма пултарать. Çанталăк çиллĕ тăнă май вăл чылай лаптăка çавăрса илеет. Вăйлă çил тухсан вут-çулăм сехетре 25-30 километр хăвăртлăхпа сарăлать. Ăна сỹнтерме питĕ йывăр.

Хисеплĕ район çыннисем, сире вăрманти пушар хăрушсăрлăхĕн правилисене пăхăнма ыйтатпăр. Уйри типĕ курăка та çунтарма кирлĕ мар. Йывăç-тĕм çывăхĕнчи курăка та вут тивертме юрамасть. Çỹп-çап куписене çунтарнă чухне вĕсене тимлĕхсĕр ан хăварăр. Вут-çулăм пĕр хуралтăран теприн çине ан куçтăр тесен вĕсен çывăхĕнчи типĕ курăкпа ăпăр-тапăра пуçтарăр. Вăрмана кайсан хăй тĕллĕн илсе кайма пултаракан материалсене, кантăк са-вăтсене хăварма кирлĕ мар. Пушар тухнине асăрхасан ун пирки вăрман хуçалăхĕн, пушар асăрхавĕн, полици ĕçченĕсене пĕлтермелле.

Алексей ЯРАБАЕВ, районти пушар асăрхавĕн патшалăх инспекторĕ.