Тăван ялтах пурăнас шухăшлă, хăйсен ĕçне пуçарса, çĕр çинче ĕçлесе выльăх-чĕрлĕх ĕрчетес тĕллевлĕ çынсем пурри, чăнах та, савăнтарать. Кун пек чухне ял-сала пĕтместех тесе шанма пулать. Акă нумаях пулмасть Чăваш Республикин Ялхуçалăх министерстви кăçал ирттернĕ конкурса хутшăнса Хĕрлĕ Чутай салинчи Николай Ежеев çемье фермине аталантарма 10 миллион тенкĕлĕх грант çĕнсе илнине пĕлтĕмĕр.

Николай Геннадьевич Ежеев выльăх-чĕрлĕх ĕрчетес ĕçе 2019 çулта пуçăннă. Унтанпа çитĕнĕвĕсем те çук мар. Мăйракаллă шултра выльăх шутне вăл 40 пуçа çитерме пултарнă, вĕсенчен 20-шĕ - сумалли ĕнесем. Сăмах май, Ежеевсен ферми Дубовка ялĕнчен инçех мар вырнаçнă. Выльăх апачĕ хатĕрлемешкĕн Николай Ежеев 127 гектар çĕрпе усă курать.

Николай Геннадьевич пĕлтернĕ тăрăх, ăна мăшăрĕ Людмила Николаевна, ашшĕпе амăшĕ - Геннадий Леонтьевичпа Раиса Григорьевна, пĕртăванĕсем тата юлташĕсем сахал мар пулăшаççĕ.

Грант укçипе Николай Ежеев 70 пуç валли сĕтпе тавар ферми тума, çĕнĕ техникăпа ун çумне кирлĕ мĕнпур хатĕр-хĕтĕр туянма планлать. Паллах, Николай Геннадьевичăн хăйĕн укçине те хывма тивĕ. Патшалăх пулăшăвĕ пĕчĕкех маррине шута илсен вăл çемье фермине çирĕплетес енĕпе пысăк тĕрев парасси иккĕлентермест.